Segundo a versom policial dos fatos, que como sempre serve de fonte única aos meios comerciais, um funcionário/a da Junta da Galiza sofreria feridas ao ser atingido por vidros na sequência do lançamento de umha bengala por manifestantes contra o edifício do governo autónomo em Sam Caetano.
[Vídeo] Montagem: a bengala nom atingiu ninguém
A revista Abordagem cita numerosos testemunhos da manifestaçom que asseguram que nom se produziu nengumha lesom. Idéntica versom mantém o repórter do Diário Liberdade, que acompanhou a manifestaçom no campo. E isso parece confirmar o vídeo dos fatos.
Embora houvo sim lançamento de ovos, foguetes luminosos e potes de fumo laranja para o interior do enreixado do edifício administrativo, em nengum momento esses objetos atingírom ninguém, segundo as informaçons do nosso repórter.
Por outro lado, até o final da manifestaçom, fôrom lançados numerosos objetos para o interior do edifício. No entanto, o nosso repórter só tivo constáncia de umha bengala –objeto que, ao parecer, está a ser assinalado como causante das alegadas lesons ao trabalhador da Junta- cujo lançamento foi recolhido no vídeo a seguir.
A bengala é lançada e atravessa o enreixado do Edifício Administrativo de Sam Caetano, mas como se pode ver nom há ninguém que receba o seu impacto, nem mesmo que esteja perto de onde cae o objeto.
A CIG, através de Paulo Rubido, já na altura desvinculou-se "completamente" do que qualificou de "incidentes" no final da manifestaçom. O Diário Liberdade nom tem constáncia neste momento de nengum pronunciamento do sindicato sobre as detençons dos últimos dias.
Galeria de imagens
Manifestaçom de 20 em Compostela
As acusaçons típicas dos casos de repressom política
"Desordens públicas", "alteraçom da ordem" e "lesons" som, segundo o site da Revista Abordagem, que acompanhou ontem todo o relacionado com o operativo repressivo, as acusaçons que enfrentam as cinco pessoas detidas ao longo desta terça-feira. Som as acusaçons habituais das forças repressivas nos casos nos que o objetivo é a repressom política.
Segundo a mesma fonte, às pessoas pedidas será-lhes demandado o pagamento de 8.000 € para arranjar os danos no local. O repórter do Diário Liberdade verificou no dia da manifestaçom que nom se produzírom a olho nu danos materiais que podam implicar tal despesa na sua reparaçom.
A versom da imprensa comercial, com os jornais de sempre à cabeça, nom duvida em assinalar o "independentismo radical" e o "anarquismo" com o dedo acusador. Nota-se que estamos em vésperas do Dia da Pátria e há começar a criminalizar estes movimentos.
Todo parece apontar a mais umha manobra de manipulaçom mediática e policial. Joseph Goebbels, sangrento ministro nazista da propaganda, dizia que "umha mentira repetida mil vezes, converte-se em realidade". Já sabemos de onde tiram suas liçons os media comerciais e a polícia.
Foto do Diário Liberdade
__________________________________________________________________________________________
[04.07.12, 00:10 h] Detenhem 5 pessoas em Compostela, acusadas de 'desordens', 'alteraçom da ordem' e 'lesons'
O site da Revista Abordagem informou ao longo do dia de ontem sobre a jornada repressiva que levou cinco pessoas presas na capital da Galiza, em relaçom com incidentes na manifestaçom do pessoal de Seaga na semana passada.
A manifestaçom do pessoal que nos últimos anos tem trabalhado na extinçom de incêndios na Galiza, protestando pola reduçom das contrataçons e a progressiva privatizaçom do serviço, tivo conseqüências umha semana mais tarde, com cinco trabalhadores presos sob as acusaçons habituais das forças repressivas nestes casos.
"Desordens públicas", "alteraçom da ordem" e "lesons" som, segundo o site da Revista Abordagem, que acompanhou ontem todo o relacionado com o operativo repressivo, as acusaçons que enfrentam as cinco pessoas detidas ao longo desta terça-feira.
Polos vistos, na manifestaçom, convocada pola CIG e que concluiu em frente às instalaçons de Sam Caetano, fôrom lançados alguns objetos contra a sede da Junta. Concretamente, a polícia espanhola fala de umha lesom a umha funcionária pública que teria sido atingida por umha bengala, sem que exista confirmaçom contrastada de tal facto.
No momento de redigirmos esta informaçom, nom há maiores informaçons, nem temos conhecimento da reaçom da CIG à operaçom repressiva. Depois da manifestaçom da passada quarta-feira, o secretário Nacional de Serviços da CIG, Paulo Rubido desvinculou "completamente" a CIG Serviços dos supostos incidentes que poderám estar na origem das detençons de ontem.
