A poucas horas de que decorra no bairro do Calvário, em Vigo, o ato de recebimento popular ao prisioneiro político galego, depois de que o Comité de Solidariedade (CSAMT) promovesse umha rápida recolha de dinheiro para pagar a fiança de 3.000 euros, estamos em condiçons de resumir as reaçons provocadas por esse facto político.

Tanto os serviços jurídicos ligados à defesa do operário viguês, como as organizaçons que mostrárom solidariedade, assinalárom a extrema gravidade de que o regime espanhol mantenha pessoas presas e em regime de dispersom penitenciária, sem qualquer prova firme nem julgamento, durante 16 meses, para depois impor um injustificável castigo económico em troca da liberdade à espera de ser julgado. 

Solidariedades e silêncios

O apoio mais direto e sustentado no tempo foi dado polo Comité criado em Vigo no mesmo momento de ser detido Miguel Nicolás, o Comité de Solidariedade e Apoio a Miguel e Telmo (CSAMT), obrigado a acrescentar o nome do segundo sindicalista detido a seguir ao próprio Miguel, Telmo Varela, que continua preso e dispersado.

Foi o CSAMT que assumiu, em 24 horas, a angariaçom do dinheiro necessário para garantir a saída imediata de Miguel, que se encontra já em Vigo e que hoje mesmo será homenageado polo movimento popular.

Nesse movimento popular, assistimos nos últimos dias ao reconhecimento e a denúncia feita pública por organizaçons e entidades como NÓS-UP, Causa Galiza, Briga ou o Movimento pola Base, que apoiárom explicitamente o recebimento de hoje no bairro viguês do Calvário em homenagem ao preso político galego.

Por sua vez, a organizaçom antirepressiva Ceivar manifestou no seu site que "se alegra" pola liberdade de Miguel, mas evitou apoiar a convocatória popular de homenagem realizada polo CSAMT para a tarde de hoje em Vigo.

Mais estranho parece que, dous dias depois da saída de prisom de Miguel Nicolás, o que era o seu sindicato no momento de ser detido, a CUT, mantenha ainda um silêncio sepulcral sobre o assunto. Na mesma linha, outras organizaçons soberanistas que noutras ocasions tenhem manifestado apoio aos presos e presas galegas, ainda nom se posicionárom sobre a excarceraçom do jovem trabalhador viguês.

Os limites da comunicaçom livre

Nom menos significativa é a posiçom dos meios de comunicaçom da Galiza em relaçom à notícia que comentamos. Unicamente temos notícia de que, junto ao Diário Liberdade, Galizalivre e Galicia Confidencial primeiro e Sermos Galiza hoje mesmo, informam nas suas páginas sobre o atropelamento jurídico que mantivo quase um ano e meio em prisom um cidadao galego que nengum tribunal julgou nem muito menos considerou culpado.

Parece normal que a imprensa burguesa e do regime silencie ou mesmo, como foi o caso do Faro de Vigo, ataque o trabalhador preso, acusando-o diretamente de factos nom provados e esquecendo qualquer presunçom de inocência. Porém, parece tam relevante ou mais o silêncio de meios e organizaçons alegadamente progressistas, que preferem nom se debruçar num assunto incómodo como é o da repressom política realmente existente no atual regime monárquico espanhol.

Convém, por último, lembrar que as prisons espanholas continuam a manter sete galegos e galegas de militáncia obreira e/ou independentista longe da Galiza, além doutros muitos e muitas ligadas à movimentos anarquistas e da esquerda de ámbito espanhol.

Reproduzimos a seguir os comunicados das organizaçons e coletivos que se tinham pronunciado no momento de redigirmos estas linhas.

CSAMT

Preso político galego Miguel Nicolás Livre!

Hoje, após pagamento de umha fiança de 3.000€, foi excarcerado o preso político galego Miguel Nicolás Aparício.

Detido em dezembro de 2010 num operativo "antiterrorista" Miguel passou mais de dezasseis meses preso nas cadeias da burguesia espanhola. Atualmente, logo de passar pola Lama e Villabona (astúrias), estava na prisom de Zuera, Zaragoza.

O seu "delito" foi ser coerente e conseqüente na defesa dos interesses da classe trabalhadora, luitar de forma organizada contra o capitalismo.

Miguel estivo dezasseis meses sem julgamento e submetido à política de dispersom que provocou o seu paulatino afastamento da Galiza. Agora Miguel acha-se agora em liberdade provisória a espera de juízo.

A constáncia e perseverança mantida na reivindicaçom da liberdade de Miguel, na denúncia da violaçom dos direitos básicos a que foi permanentemente submetido por parte do Estado espanhol, tem sido um fator determinante à hora de conseguirmos libertá-lo.

Hoje finalmente volta a estar na Pátria e com o seu povo.

O Comité de Solidariedade e Apoio a Miguel e Telmo (CSAMT) congratula-se de termos o Miguel novamente connosco e agradece o conjunto de pessoas, entidades e organizaçons que nestes dezasseis meses de forma constante tenhem contribuído na luita pola liberdade de Miguel saindo a rua, colaborando economicamente, respaldando as iniciativas que mantivérom acesso o facho da sua liberdade.

Embora hoje é um dia feliz nom devemos dar por concluída a nossa luita. O camarada Telmo Varela continua preso no cárcere espanhol de Topas (Salamanca) e mais seis patriotas galeg@s seguem encarcerad@s sob as gadoupas da Espanha.

NÓS-UP

Miguel Nicolás, bem-vindo à Pátria!

NÓS-Unidade Popular manifesta a sua satisfaçom pola liberdade do companheiro Miguel Nicolás, trabalhador do metal detido em dezembro de 2010.

O encarceramento de Miguel Nicolás e Telmo Varela é nem mais nem menos que a expressom mais clara do ódio de classe que à oligarquia lhe inspira a mobilizaçom operária. Que foram eles os escolhidos para sofrerem a repressom exemplarizante de maos do aparelho judicial espanhol, nom é, naturalmente, um acaso. Portanto, a atitude destes dous companheiros deve ser tomada como exemplo.

Nom esquecemos duas cousas: a primeira, que Telmo Varela continua preso e a sua liberdade deve ser umha reivindicaçom que temos que levar ali onde se produzir umha mobilizaçom operária, porque Telmo é um valente defensor dos direitos da classe tabalhadora, e a segunda, que a libertaçom do Miguel Nicolás nom é um ato de magnificência. De facto, o Estado espanhol vende cara a sua libertaçom: nada menos que 3.000 euros de fiança. Mas esta tentativa de humilhaçom contra o movimento operário deve ser aproveitada para fazer umha autêntica demonstraçom de solidariedade de classe.

NÓS-UP apela a contribuir na conta solidária com Miguel e Telmo

La Caixa 2100-2304-92-0101136176.

Direçom Nacional de NÓS-UP

Galiza, 2 de maio de 2012

Causa Galiza

Causa Galiza saúda a libertaçom do preso independentista galego Miguel Nicolás

Hoje saiu em liberdade o preso independentista galego Miguel Nicolás Aparício após dezasseis meses preso e dispersado ilegalmente nos cárceres de Espanha. A excarceraçom do companheiro detido em dezembro de 2010 produz-se após abonar a quantidade de 3000 euros à Justiça espanhola. Fica em liberdade provissória à espera da celebraçom de juízo.

Causa Galiza parabeniza-se pola excarceraçom do militante galego, à vez que demandamos a repatriaçom imediata de todos os independentistas pres@s e dispersad@s na geografia penitenciária do Estado e a sua liberdade.

Recebimento popular

Causa Galiza soma-se à convocatória do Comité de Solidariedade e Apoio a Miguel e Telmo (CSAMT) que convoca um recebimento popular a Miguel Nicolás Aparício na próxima sexta-feira 4 de maio a partir das 19:30 h. no mercado do Calvário (Vigo).

Movimento pola Base

Celebramos a liberdade de Miguel Nicolás

Desde o MpB celebramos a saída do cárcere do compañeiro Miguel Nicolás, independentista galego preso desde decembro de 2010 sen ser xulgado.

Miguel levaba 16 meses en prisión nos que se lle aplicaron as ilegais e arbitrarias leis antiterroristas do estado española, así como a política de dispersión, en virtude da cal pasou polas cadeas da Lama, Villabona (Asturias) e Zuera (Zaragoza). Agora sae en liberdade provisional despois de pagar unha fianza de 3000 euros e á espera do xuízo no que está imputado xunto con Telmo Varela, que tamén está preso desde marzo de 2011.

O Comité de Solidaridade e Apoio a Miguel e Telmo convocou para o 4 de maio un recibimento popular a Miguel, que terá lugar ás 19:30 diante do mercado vigués do Calvario. Logo haberá unha cea solidaria ás 21:00 no centro social Lume!

BRIGA

O jovem viguês Miguel Nicolás será libertado esta semana

Poucas vezes temos o prazer de emitir comunicados expressando tanta alegria. O jovem operário viguês Miguel Nicolás Aparício sairá ceivo da prisom de Saragoça onde permanece seqüestrado desde que fora detido e encarcerado "preventivamente" conforme autorizam as leis espanholas. Em todo este tempo, Miguel foi dispersado do país em aplicaçom da política de castigo que endurece as condiçons de vida d@s pres@s e d@s familiares, amig@s e companheir@s. E nem só: também lhe foi mudado o centro penitenciário até em duas ocasions.

Os 3.000 € de fiança solicitados polo juiz para conceder a liberdade condicional suponhem um esforço da contorna mais achegada do repressaliado. É por isso que o Coletivo de Solidariedade e Apoio a Miguel e Telmo (CSAMT) chama à solidariedade económica achegando um número de conta no seu blogue.

Umha vez depositada esssa quantidade, e no praço de umhas horas, Miguel será libertado. Um grupo de membros do CSAMT encontram-se já na rota cara ao cárcere de Zuera para recebê-lo e trazê-lo de volta à Galiza, onde será homenageado na sua cidade de origem com um recebimento popular. Será sexta-feira 4 de maio às 12,30 horas no mercado do Calvário.

Miguel está acusado de ter atacado um escritório público de emprego. Desde 15 de dezembro de 2010 permanece encerrado sem julgamento. A sua entrega na militáncia independentista e comunista galega e o seu espírito comprometido e generoso som o passaporte que o levou às gadoupas do nosso inimigo.

MIGUEL, COMPANHEIRO, BEM-VINDO À CASA!

LIBERDADE PRES@S POLÍTIC@S GALEG@S!

Última hora: Miguel já está fora da cadeia!

Miguel Nicolás fica em liberdade apos o pagamento de 3000€ de fiança

Ceivar

O preso independentista galego Miguel Nicolás Aparírio ficava em liberdade previsória hoje 2 de Março de 2012 por volta das 14:00 da prisom de Zuera (Zaragoça), depois de abonar 3000€ de fiança imposta polo juiz que instrui o caso.

Como informavamos ontes esta fiança está recurrida pola equipa de advogados por via dum recurso com a intençom de que a mesma seja retirada ou no seu defeito rebaixada ja que se considera excesiva, sendo a diferença económica devolta.

Desde Ceivar alegramonos desta nova e e desejamos-lhe a Miguel umha bem-vinda a Terra.

BEM-VINDO MIGUEL NICOLÁS!!

A DISPERSOM É TORTURA!!

LIBERDADE INDEPENDENTISTAS GALEGOS!!