A do BNG foi, como sempre, a maior de todas, se bem a participaçom ficou muito aquém dos números oferecidos pola própria organizaçom. Haveria que dividir entre 3 os supostos 20 mil manifestantes para se aproximar minimamente da realidade, mas o (auto)engano continua a ser a pauta geral na contagem de participantes nas mobilizaçons.

Destaca, no plano simbólico, a desmarcagem protagonizada polo BNG em relaçom aos seus ex-amigos da burguesia catalá: Convergència i Unió. A escusa de umhas declaraçons antigalegas de dirigentes de CiU serviu para que o BNG se desfigesse de um sócio adscrito, desde sempre, ao neoliberalismo extremo, e que deixava o BNG numha incómoda posiçom em tempos de crise e de radicalizaçom da linguagem.

A mudança de rumo nas políticas económicas, a modificaçom da Uniom Europeia (nom o abandono por parte da Galiza) fôrom alguns dos argumentos repetidos polos dirigentes do BNG, organizaçom apresentada como "dique contra as desigualdades". Jorquera, candidato à Junta nas eleiçons do ano próximo, prometeu "construir o País a partir do governo", caso podam repetir a fórmula bipartida junto ao PSOE para ocupar os postos que agora açambarca o PP no Hórreo e Sam Caetano.

Beiras apela diretamente a Izquierda Unida para umha "frente comum" eleitoral

A ameaça de reduçom do número de deputados e deputadas, que reforçaria a presença do PP na cámara autonómica e tornaria ainda mais difícil para as forças minoritárias acederem ao Parlamento, provocou que Beiras reconhecesse abertamente o objetivo de articular umha "frente comum de esquerda" do que denominou "todo o espectro nacionalista" com "a esquerda estatal que reconheça o direito de autodeterminaçom do povo galego", em clara alusom a Izquierda Unida, nominalmente autodeterminista, mas defensora de um modelo estatal espanhol de caráter "federal".

Beiras encheu a praça de Maçarelos, no centro histórico de Compostela, para dirigir um discurso que, tal como o dos seus ex-companheiros do BNG, tivo um claro cheiro eleitoral. Junto a ele já comparecêrom representantes dos soberanistas o MpB e a FPG, a qual concorda com Beiras no objetivo da uniom com o reformismo espanholista de Izquierda Unida. 

Compromiso con Galicia fai ato político em Bonaval

Por último, Compromiso por Galicia juntou centenas de pessoas que escuitárom os discursos de X. M. Báscuas e Peres Bouça em Bonaval, girando os discursos também em torno das próximas eleiçons e das necessárias alianças para tentar entrar no Parlamento.

Na realidade, as aspiraçons do ex-senador do BNG e defensor no seu dia da instalaçom de umha base da NATO na sua terra, Ourense, dixo que aspira a que Compromiso con Galicia se converta no "referente social maioritário da cidadania galega" e "a casa comum do galeguismo".

Meios do sistema silenciam independentismo e repressom

Na altura de redigirmos estas linhas, estas três convocatórias som praticamente as únicas referenciadas nos meios de comunicaçom da burguesia, ficando fora qualquer referência às manifestaçons de NÓS-UP e Causa Galiza.

Tampouco vemos nos meios do sistema informaçons sobre a proibiçom governativa da manifestaçom juvenil de Briga e sobre como umha sentença do Tribunal Superior de Justiça da Galiza permitiu finalmente essa marcha. As intimidaçons, ameaças e agressons a participantes em iniciativas independentistas por parte da polícia espanhola ficam também fora das rotativas burguesas.

Foto: CC BY-SA Merixo.