ANova - Irmandade Nacionalista é o nome escolhido para umha organizaçom com um modelo de adscriçom formalmente individual, mas que reflete umha articulaçom de partidos e coletivos (Encontro Irmandinho, MpB, FPG, Nova Esquerda Socialista, FOGA...). De facto, foi com esse critério que se elaborou a proposta aprovada na Assembleia para a configuraçom da Coordenadora Nacional (direçom política) e foi a partir das diferenças entre os partidos sobre as suas quotas nessa lista que se produzírom os primeiros abandonos (Causa Galiza e CNM).

A Assembleia Constituinte juntou por volta de meio milhar de inscritos e inscritas com direito a voto, ficando aquém das expetativas da principal força promotora, que dirigiu todo o processo: o Encontro Irmandinho de Xosé Manuel Beiras.

A crítica à cultura organizativa do BNG e a necessidade de criar umha nova, bem como a assunçom explícita da etiqueta "independência" e do republicanismo, o monolingüismo social e mesmo umha inconcreta aposta na aproximaçom ao mundo lusófono fôrom aprovados como princípios ideológico-políticos. Nom assim umha emenda que reclamou a definiçom como "anti-sionista" para a nova organizaçom.

Entre os debates adiados, ficárom a proposta de dissoluçom das forças políticas, visto que algumhas delas rejeitam por enquanto essa possibilidade, e a aliança eleitoral com Compromiso por Galicia (sic), se bem o próprio Beiras fijo umha piscadela a esse grupo liberal-galeguista para avançar na unidade de cara às eleiçons do ano próximo.

Nom faltárom queixas pola forma como se gerírom as emendas ou sobre o papel da Mesa no desenvolvimento da Assembleia. Como contraponto, ANova deu mostras de transparência informativa, ao fazer a sua Assembleia praticamente de portas abertas para quem quijo assistir e informar diretamente do interior da sala.

Umha vez concluída a jornada de ontem, podemos já dizer que as cisons sofridas polo BNG no último ano cristalizárom em duas organizaçons (ANova e Compromiso por Galicia), nos dous casos refundando-se e ganhando a adesom de novos coletivos criados fora do BNG, mas movimentando finalmente menos pessoas das que figeram oposiçom à UPG na última Assembleia Nacional do Bloque.

Integraçom de parte do independentismo e outros efeitos colaterais...

Como efeito colateral, as ruturas no seio do BNG provocárom o esfarelamento da precária aliança entre FPG, MpB e OLN (integrantes de Causa Galiza depois do abandono, um ano ano antes, de NÓS-UP). Essas três forças (FPG, MpB e OLN) participárom até anteontem no processo para a constituiçom do chamado NPC, mas só as duas primeiras (FPG e MpB) tomárom parte na Assembleia constitutiva. Delas, só a FPG colocou várias pessoas na direçom, após a renúncia do MpB a se integrar no organismo de direçom pola "falta de transparência na gestom da lista", segundo declarárom ao Diário Liberdade fontes desse partido.

O independentismo fica assim dividido entre as forças integradas em ANova (FPG e MpB) e as que ficárom fora (NÓS-UP, que se mantivo à margem do processo desde o princípio, e Causa Galiza, que o abandonou um dia antes da Assembleia de ontem).

É previsível que nos próximos meses, com as eleiçons autonómicas como horizonte, se avance numha aliança entre ANova e Compromiso por Galicia, com o objetivo de disputar o espaço eleitoral da esquerda reformista nacional, hoje hegemonizado polo BNG como terceira força do Parlamento autónomo.

Entretanto, no campo soberanista, NÓS-Unidade Popular já anunciou que vai manter o seu roteiro próprio, alheio às disputas internas no campo reformista, e descartando unidades orgánicas com outras correntes, por falta de condiçons no momento atual. Quanto a Causa Galiza, algumhas fontes apontam para umha suposta refundaçom da corrente política representada pola OLN "nas próximas semanas".

De maneira imediata, e com o Dia da Pátria às portas, podemos passar das duas manifestaçons patrióticas confirmadas neste momento (BNG e NÓS-Unidade Popular) a três ou quatro, em funçom das decisons que puderem vir a tomar ANova e Causa Galiza.

Foto: Assembleia Constituinte do NPC, ontem em Compostela (@PabloGuimerans)