Foto: Xoán Báscuas, novo líder de +Galiza, e Xosé Manuel Beiras, líder do Encontro Irmandinho.
De facto, nas seguintes semanas a esse anúncio, tenhem-se sucedido novidades interligadas que, ao que todo indica, respondem a umha mesma dinámica: Abandono de Esquerda Nacionalista, do PNG e das juventudes de Mais Galiza; abandono do setor maioritário de Mais Galiza -reconvertido em partido; extinçom do grupo Inzar; abandono da FPG de Causa Galiza...
Congressos, assembleias, plenários...
Na mesma linha de tempo político, para as próximas semanas estám marcadas várias convocatórias dos máximos organismos de entidades soberanistas: no próximo sábado, 17 de março, a III Assembleia Nacional da Organizaçom para a Libertaçom Nacional (OLN), principal integrante de Causa Galiza; para o seguinte fim de semana, no domingo dia 25 de março, Plenário Nacional de Causa Galiza, com a sua conversom em organizaçom política em pauta; já no sábado seguinte, dia 31 de março, Conferência Política do Movimento pola Base, para aprovar umha posiçom perante o processo em curso...
Se nos primeiros dias depois de o Encontro Irmandinho abandonar o BNG diferentes entidades como Causa Galiza, Esquerda Nacionalista ou o PNG se pronunciárom a favor de umha confluência de forças fora do BNG, o passar das semanas tem trazido mais gestos e declaraçons sobre o assunto "na moda" no mundo nacionalista, que apontam na mesma direçom.
FOGA, FPG, Encontro Irmandinho...
O último a pronunciar-se foi a FOGA, coletivo também saído do BNG e formado sobretodo por sindicalistas da CIG, que no seu blog declara que "pretende construir umha plataforma mais ampla e plural" junto com outras organizaçons políticas, entre as que cita o Encontro Irmandinho (EI) e a Frente Popular Galega (FPG). De facto, o próprio Xosé Manuel Beiras participou junto ao grupo sindical afim à FOGA na manifestaçom do 10 de março em Vigo.
'Ecogaleguistas', ex-PSOE, IU?...
'Ecogaleguistas', nova formaçom pacifista, verde formada a partir de membros de diferentes ONGs, já mostrou a sua disponibilidade para integrar umha "cooperativa política" que se apresente às próximas eleiçons, tal como um grupo de ex-militantes recém cindidos do PSOE viguês, que também querem integrar a nova formaçom resultante do processo.
Na sucessom de informaçons sobre os movimentos fora do BNG, nem sequer falta Izquierda Unida. No passado dia 2 de março, numha entrevista com o portal 'Praza Pública', o seu deputado Gaspar Llamazares, partidário de posiçons "federalistas" e de entendimento com os nacionalismos periféricos, propunha que "falando com outros", a sua organizaçom pudesse "configurar umha candidatura e umha proposta sólida" de cara às eleiçons autonómicas galegas. No entanto, fica a dúvida sobre a posiçom que poderá vir a tomar o PCE, hegemónico em Izquierda Unida, e na atualidade virado para posiçons claramente espanholistas.
Eleiçons às portas: reformulaçom iminente?
Altermundistas, Neoliberais, ex-PSOE, soberanistas, autonomistas, ecologistas, pacifistas... Com as Eleiçons ao Parlamento autónomo galego às portas, provavelmente no próximo outono, todo indica que caminhamos para umha rápida confluência total ou parcial dos setores envolvidos.
Quanto ao BNG, ficam a UPG como força hegemónica, o MGS como assistente e o setor minoritário de Mais Galiza, formado sobretodo por cargos institucionais, que querem reorganizar-se no interior. Curiosamente, o jornal La Voz de Galicia, inimiga permanente da Galiza e das ideias da esquerda, está a servir de palco de exceçom para acompanhar tanto a crise do Bloque como a recomposiçom fora.
Por outra parte, e se bem continua sem fazer declaraçons sobre o processo, NÓS-Unidade Popular parece ser a única entidade que, alheia a tam complicado cenário, opta pola construçom de umha corrente própria.
