A Secretaría das Mulleres do Sindicato Labrego Galego apoiará as diversas accións que se desenvolverán na Galiza durante os vindeiros seis meses, e que rematarán o 8 de marzo, por coincidir plenamente coas denuncias e demandas desta campaña.

Dende a Secretaría das Mulleres do SLG denunciamos que as labregas están a sufrir de xeito moi especial esta crise, pois amais de padecer o seu impacto dobremente por ser mulleres, tamén o padecen por vivir no rural, onde as retalladas de servizos, en sanidade, educación ou atención á infancia e ás persoas maiores están a ser moito máis drásticas; e por traballar en sectores que, coma o lácteo, están a padecer a maior agresión da súa historia, que se ve traducida na ruína das explotacións. A crise económica e a vaga de recortes abocará a miles de mulleres labregas a deixar de cotizar á Seguridade Social, a non darse de alta como titulares renunciando así a moitos dereitos ou a ver incrementadas as súas cargas familiares pola falla de asistencia social.

Por todo o devandito, a loita da Marcha Mundial das Mulleres é tamén a loita das labregas do SLG, razón pola que reiteramos o noso apoio activo á campaña "A débeda dos gobernos é coas mulleres, non cos bancos".