Os dados, até agora, confirmam essa previsom da Uniom Profissional da Galiza (UPdG), que junta 45 colégios profissionais galegos, pois segundo o INE (organismo espanhol de estatística) até julho já saíram 10.000 pessoas na procura de um futuro que na Galiza a crise capitalista lhes rouba.

O aprofundamento da já dramática situaçom económica e social, e a cada vez mais agressiva e criminal política de cortes aplicada polas administraçons espanhola e autonómica nom indicam que essa sangria vaia se deter, bem mais o contrário. Assim, isso fará com que se ultrapasse o recorde dos últimos 50 anos “de saída de profissionais galegos para outros países”, afirmam da UPdG

A organizaçom profissional, com a informaçom cedida polos colégios afiliados, destaca que a maior parte das pessoas que emigram som jovens e com elevadas qualificaçons profissionais. A força de trabalho abandona a Galiza a ritmos que “recordam os fluxos registados nos anos 60”, asseguram.

O futuro da Galiza escapa a passos acelerados enquanto esperamos por umha recuperaçom económica impossível num quadro capitalista esgotado e cujos gestores e gestoras só tencionam alargar os prazos até o colapso final, para assim aumentar o volume do saqueio.

E a Junta encoraja a escapar

Além das medidas de corte, de criaçom de desemprego, de roubo de salários e de destruiçom social, os governos neoliberais estám decididos a apoiar a perda de trabalhadores e trabalhadoras qualificadas.

Assim, há poucas semanas a Junta da Galiza premiava os 60 melhores expedientes universitários do país com 2.500 euros e, surpreendentemente, umha mala doada pola empresa Quobis.