O curso está organizado pola Universidade da Corunha e a CTNL, e centra-se em analisar, conhecer e procurar vias de participaçom e implicaçom no processo social de normalizaçom da língua galega. Nel intervirám pessoas expertas em sociologia, intervençom, participaçom e comunicaçom de Catalunha, Madrid, O Salvador, Euskadi e Galiza.
Temas
Entre os temas que se abordan: desde “as portas estám abertas” a “este projeto é teu”; a importancia da democracia implicativa; experiências de implicaçom desde a base ou desde entidades; a participaçom na dinamizaçom no País Basco; as potencialidade do jogo sério para a implicaçom en projetos; a comunicaçom implicativa; etc. O curso tem lugar no Forum Carvalho entre o 17 ao 19 de julho.
Os objetivos principais som refletir sobre o papel central da participaçom, a implicaçom e o traballo colaborativo nos processos de mudança social e conhecer e procurar formas de busca e apoio da participaçom e implicaçom na dinamizaçom lingüística.
O prazo de matrícula está aberto até o día 11 de julho e pode fazer-se através do web da Universidade da Corunha:http://www.udc.es/occ/gal/2013/cursoveran/web/curso14/curso14.htm.
Intervençons e propostas
Ao longo dos três dias intervirám especialistas como a arquiteta salvadorenha Alicia Tenze, da Rede Cimas, de profissionais comprometidos com a transformaçom social, que na conferência inaugural falará sobre métodos e estratégias de implicaçom. Também se conhecerám experiências de implicaçom galegas desde administraçons, como o projeto Sonda Norte, de Riba d'Eu, através de Xavier Campos, ou a Rede de Entidades Amigas da Língua, de Ponte Vedra, através de Conchi Cochom; e a viceversa, com experiências de implicaçom de base, com a intervençom do dinamizador e contador Celso F. Sanmartín, do padre Rubém Aramburu ou de Paco Veiga, da Associaçom Galega do Jogo Popular e Tradicional. Para fechar o dia haverá umha sessom de jogos populares, com chave, rá, pernas de pau, peóm, mariola, corda, aro...
No segundo dia, o técnico da cooperativa basca Emun, Txerra Rodrigues, falará sobre a participaçom e a implicaçom no trabalho dinamizador no País Basco. A continuaçom, o coach madrileno e facilitador Lego Serious Play, Carlos Martínez, explicará as potencialidades inovadoras do “jogo sério” para a implicaçom em projetos. Da mao do dinamizador burelao Bernardo Penabade, as pessoas participantes conhecerám métodos, estratégias e experiências de implicaçom em dinamizaçom lingüística, e, para fechar o dia, Queca Carvalho apresentará o Viveiro de propostas normalizadoras da CTNL, a partir do que as participantes trabalharám em diversas propostas.
E já o último dia, sexta 19 de julho, a presidenta de Implicados no Desenvolvimento e educadora social, Ania Pinheiro, explicará métodos e experiências para a comunicaçom implicativa. Da conferência de clausura encarregará-se a consultora catalá em gestom pública e participaçom cidadá Marta Martorell, que falará de democracia implicativa para os processos de mudança social.