A palestra, intitulada 'Eu quero umha Escola Semente em Vigo, e tu?' decorrerá no Centro Cívico de Teis, dia 25 polas 11:00 horas, e fai parte de umha proposta para promover umha escola com premissas análogas à Semente que atualmente funciona com sucesso na capital galega.

A palestra contará com a participaçom de pessoas envolvidas no pioneiro projeto de ensino na capital galega. 

A Escola Semente

A Escola Semente e um espaço educativo interativo laico, de criatividade e inovaçom, onde som proporcionadas as ferramentas necessárias para o desenvolvimento das capacidades das crianças, fazendo possível que sejam cidadás livres e críticas. Mediante umha pedagogia transformadora que entende a escola como parte integrante da sociedade. Este rege-se por assembleia, onde participam dumha forma horizontal pais, as mães, professoras e crianças.

Todas as actividades som desenvolvidas em galego, favorecendo a adquisiçom, conservaçom, cuidado e consolidaçom do nosso idioma. Entendendo a língua galega e o seu carácter internacional como parte indissolúvel da nossa cultura.

Um lugar onde se defendem a liberdade responsável, o respeito e a autoregulaçom; a educadora ou educador confia plenamente na criança; respeitando-a como pessoa tentando proporcionar as ferramentas para elas solucionarem os seus conflitos por si próprias. Tenta-se favorecer a plena consciência por parte da criança da sua liberdade, mas também da existência duns limites básicos de respeito a outras pessoas e ao seu contexto.

A pessoa educadora é umha mediadora que acompanha a criança no seu processo de aprendizagem. Mediante o amor, a compreensom e a empatia pais, mães e professorado melhor podem levar estes princípios à criança.

Umha educaçom inserida na natureza, baseada na igualdade de género em todos os aspectos da vida, um espaço de interculturalidade aberto à comunidade, onde as crianças compreendem a importância e o respeito doutras culturas e que permitem interagir, crescer e trabalhar conjuntamente. Que se preocupa com a realidade do bairro e da vizinhança, tratando-se portanto dumha educaçom ligada à realidade do povo.