Isto fainos reafirmarnos  na necesidade de tomar todos os medios para defender a nosa clase e rachar co seu sistema no que (sobre)vivimos. Nestas datas tense que facer real a unidade en todo o sector educativo contra estas medidas que nos afogan día a día e nos condenan a unha educación lamentable. Que nos impiden realizarnos como persoas transformándonos en mercadorías nas mans dos empresarios, que con nós xogan como bonecas, sen ter en conta as consecuencias, sen ter en conta que nós temos a forza, a ilusión e as ganas  que farán cambalear este sistema ata derrubalo.

Por isto chamamos a todo o estudantado, a toda a comunidade educativa e á mocidade en xeral a sumarse á folga deste vindeiro 9 de maio. E defender, na rúa, o que nos pertence. Defender unha educación en galego, laica, antipatriarcal, humanista, transversal e universal. Porque a educación ten que ser unha ferramenta do pobo para desenvolverse libremente, para acadar un pensamento autónomo que nos permita crecer como persoas analizando a nosa propia realidade, a pesar da vontade  dos poderosos de manternos cegas ante a barbarie do capitalismo que se fai cada vez máis insoportable. Nós, como mocidade comunista e independentista, loitamos por un futuro máis digno para todas. Non nos deixemos transformar en produtos, en mercadorías que vender e mercar. Temos que asumir o noso papel no cambio, cara á destrución deste sistema.

Estudante, ergue o teu puño e sae á rúa o día 9 de maio, demostrarémoslles quen ten o poder.

Foto: Galiza Contrainfo / Flickr - Alguns direitos reservados - Umha estudante manifesta-se contra a LOMCE em Vigo.