Dende a central sosteñen que entre as funcións do Executivo está a de defender os empregados/as públicos/as.

A federación da Administración Pública da CIG de Pontevedra vén de amosar o seu rexeitamento ao indulto concedido polo Goberno español do PP ao construtor da Illa de Arousa Juan Manuel Chaves Daporta, condenado por un Xulgado do Penal polos delitos de detención ilegal, atentado e lesións a unha funcionaria pública.

Dende a central nacionalista critican a decisión do Executivo que preside Mariano Rajoy ao entender que entre as súas funcións está a de defender os seus empregados/as, polo que aseguran non entender que actúe desta forma “cunha persoa que quedou demostrado atentou contra a integridade física e psiquica dunha funcionaria municipal”.

Así, reiteran a súa total repulsa ao indulto e esíxenlle aos distintos gobernos (estatal, autonómicos e locais) que actúen en defensa dos empregados/as públicos/as.