Convocadas polos comités de trabalhadores/as de Navantia e das auxiliares, milhares de pessoas marchárom na manhá de hoje, mais umha vez, em defesa de um setor naval cada vez mais deteriorado e sem mais alternativa que as promesas sempre incumpridas dos sucessivos governos.
Com saída da praça do Inferninho e chegada na praça do Concelho, a mobilizaçom nom foi das maiores, mas reuniu vários milhares de pessoas, com leitura final do manifesto a cargo da atriz Isabel Risco, quem defendeu a dignidade e a necessidade de que o naval exerça o seu papel de "motor" da Galiza.
CIG, CCOO, UGT, CNT, USTG, MAS e outros coletivos sindicais presentes na comarca trasanquesa participárom na manifestaçom, na qual se percebeu especial motivaçom nas numerosas candidaturas de esquerda que se apresentam às eleiçons municipais deste mês de maio em Ferrol: PSOE, BNG, Ferrol em comum, Maré Ártabra e PCPE, incluindo vários líderes nacionais. Todas elas levárom faixas e outros elementos visuais para apelar aos milhares de potenciais votantes participantes na marcha em defesa do naval.
Com um setor naval em vias de desapariçom, nengumha força política, incluído o PP, deixa de reivindicar o seu futuro. Porém, a realidade é que a falta de carga de trabalho, a exploraçom e precarizaçom som cada vez mais gerais, sem que as dirigências sindicais afrontem os factos para além das convocatórias "de serviço".
Tentando conhecer a opiniom do presidente da cámara e candidato do PP no concelho de Ferrol, no Twitter só encontramos um José Manuel Rei satisfeito polo êxito da Fashion Night...
Fotos: @Zabumba1 e @RECinhibit