Traballadores de Maessa concentráronse este xoves diante das portas do estaleiro de Ferrol para denunciar a situación laboral na que se atopan logo de que a empresa convocara ao Comité a unha negociación para ampliar a vixencia do ERE e ameazara con abandonar os traballos en Navantia se o persoal non se aviña a asumir unha rebaixa salarial.

A esta situación, denunciou o persoal durante a protesta, chegase polas dificultades de Maessa de acceder ás contratas no estaleiro, debido á "competencia desleal" doutras auxiliares que non están a cumprir cos acordos laborais que rexen dende 2001. Así, referiron que hai compañías concursando á baixa na adxudicación dos restantes bloques para a construción do flotel. Unha situación, criticaron os traballadores, "consentida por Navantia".

De feito, apuntaron que a oferta de Maessa para a segunda adxudicación (parte de popa) resultou un 17% máis cara, "porque si cumpre os acordos".

A resposta de Maessa á esta situación non se fixo agardar e convocou ao Comité para negociar a renovación do ERE, pretendendo, ademais, impor un recorte de salarios baixo a ameaza de abandonar a actividade no estaleiro. Á vista do perigo que corren os seus empregos, os traballadores/as acordaron convocar a mobilización deste xoves diante da entrada principal de Navantia e denunciar publicamente esta situación.

Neste senso, o Secretario Comarcal da CIG-Industria, Vicente Vidal, afirmou que dende as centrais sindicais se exixirá as empresas o cumprimento estrito dos acordos e a Navantia que obrigue ás auxiliares que traballan dentro dos estaleiros a respectar os pactos laborais.