Convertendo á "vítima en verdugo", como di Xesús A. López Pintos, secretario comarcal da CIG de Ferrol, a fiscalía vén de pedir para el as penas de 2 anos e 9 meses de cadea, con inhabilitación especial para exercicio de dereito de sufraxio pasivo durante o tempo da condena por un delito de atentado e falta de lesións; 20 días de multa, con 7€ diarios, e unha indemnización de 840€ por lesións a un axente de policía polos feitos acontecidos en Ferrol, durante unha carga policial contra as persoas participantes nunha concentración convocada polo comité de Navantia e Poligal coincidindo coa apertura da campaña electoral do Partido Popular ás autonómicas de 2012.
No relato que a fiscalía recolle como conclusións provisionais, e que Pintos asegura que son "falsas", non se fai referencia algunha á carga policial que foi no seu momento cualificada como "brutal" por parte das organizacións sindicais, nin tampouco a como se produciu a súa detención e moito menos á denuncia que este presentou por torturas e malos tratos na propia comisaría.
Pintos lembra que hai máis de 20 minutos de imaxes gravadas pola Sexta nas que se ve como se produciron os feitos e nas que asegura que queda constatado que non houbo agresión algunha pola súa parte a ningún dos policías. Lembra tamén que foi detido e permaneceu esposado máis de dúas horas e que durante a súa estancia na comisaría padeceu os golpes dun policía, tal e como relata no vídeo.
Testemuñas do Partido Popular
Entre as testemuñas que presenta a fiscalía aparecen o deputado do PP Hipólito Fariñas; o recén nomeado portavoz do Partido Popular Miguel Angel Tellado; o Presidente da Deputación da Coruña, Diego Calvo e o alcalde de Ferrol, José Manuel Rey Varela.
A Fiscalía pretende ademais que se tramite como procedemento abreviado, o que xa foi recorrido pola CIG.
Ante isto, o secretario comarcal da CIG de Ferrol entende que o Partido Popular busca unha sentenza rápida e exemplarizante de cara ás próximas eleccións municipais co obxectivo de amedrentar e que non se produzan novas mobilizacións e actos de protesta contra o PP durante a campaña porque sabe que hai un grande malestar social na comarca e que "se daquela a situación era grave hoxe é moito peor. O paro medrou escandalosamente, non se albiscan solucións para o sector naval, pechan empresas e a situación socio-económica é dramática".
Para Pintos resulta inaudito que se presente esta acusación contra el e, sobre todo, que queiran converter máis unha vez á vítima en verdugo.