Nom é umha novidade, mas o Instituto Nacional (espanhol) de Estatística (INE) confirma a sobreexploraçom da força de trabalho galega em relaçom à espanhola, nesta ocasiom comparando o custo salarial por trabalhador/a e mês.
O custo mensal de cada trabalhador/trabalhadora na Galiza foi no segundo trimestre de 2014 de 1.671,88 euros, frente aos 1.929,58 euros da média espanhola no mesmo período. No caso galego, esse dado representa umha diminuiçom desse custo no caso galego de 0,2%.
Por hora efetiva, o salário é de 12,43 euros na Galiza, frente aos 14,71 euros da média espanhola. A aumento nominal de 1,5% em relaçom ao ano anterior no caso galego contrasta com o incremento de 3,7% na média espanhola. Contodo, há que ter em conta que esses aumentos nom som reais, pois só se referem às quantidades do ano anterior e nom ao incremento paralelo dos preços, que foi de 0,1% no primeiro semestre de 2014. Umha manobra capitalista para fazer crer que há incremento onde há desvalorizaçom. Em todo o caso, no caso galego a diferença incrementou-se em relaçom ao espanhol, confirmando a discriminaçom da classe trabalhadora galega se comparada com a espanhola.
Também no custo laboral total a Galiza regista piores dados que Espanha: concretamente, 2.291,77€ face a 2.580,64€. Levado ao custo por hora, 17,04 euros na Galiza e 19,67 euros em Espanha. Em número de horas, os trabalhadores e trabalhadoras pactuárom em média 153,1 por mês face às 149,3 espanholas.