A manifestación celebrouse xusto cando se cumpren 15 días do inicio da folga de fame por parte da sección sindical para reclamar a readmisión dos traballadores despedidos, tempo no que varios compañeiros/as foron substituídos tras sufrir problemas de saúde, e partiu pasadas as oito da tarde da Praza de América para rematar arredor das dez da noite coa interpretación do himno galego ás portas de Citroën.
Durante o percorrido, no que tamén estiveron presentes distintas organizacións sindicais, políticas e sociais, as consignas máis escoitadas foron "Despedidos readmisión", "Citroën atende a CIG non se vende", "Non pode ser obreiros na cadea e corruptos no poder" ou "O criminal e o capital".
Antes, o secretario comarcal da CIG de Vigo, Serafín Otero, e o integrante máis veterano da sección sindical de Citroën, Henrique Pérez, denunciaron durante as súas intervencións diante das instalacións da empresa o “réxime de terror” que pretende instaurar a multinacional francesa e chamaron a continuar as mobilizacións até que os dous traballadores sexan readmitidos.
Pérez amosouse moi crítico coa política de represión laboral que está a aplicar a dirección e incidiu na mesma idea que expresaron os dous despedidos, que din sentirse 'cabezas de turco': “Esta decisión tan drástica como nunca antes se vira na fábrica é un golpe enriba da mesa da empresa para meterlle o medo no corpo á xente coa finalidade de evitar que poida reivindicar os seus dereitos”. Neste senso, asegurou que “dentro da fábrica poderán arrincarnos a carne e mesmo os ósos, pero non nos van quitar a dignidade”.
Pola súa banda, o secretario comarcal da CIG-Vigo enmarcou o conflito laboral no contexto de ataques e agresións contra a clase traballadora “que está a protagonizar o PP”. Ao mesmo tempo, censurou o comportamento das centrais sindicais maioritarias en Citroën, en especial CCOO e UGT, pola súa actitude insolidaria dende que se coñeceron os despedimentos.
Nesta liña expresáronse tamén dende a sección sindical da CIG-Citroën durante a concentración solidaria que se desenvolveu como cada día diante da fábrica de 13.15 a 14.15 horas despois de ter coñecemento da aparición de pintadas que culpan á CIG dos despedimentos. “Hai organizacións ás que se lle enche a boca coa defensa da clase traballadora pero logo actúan como verdadeiros delincuentes sindicais”, sentenciaron.
Permiten entrada de persoal sanitario tras 15 días
O persoal sanitario de confianza dos folguistas puido acceder finalmente ao interior da dependencias tras 15 días nos que a dirección de Citroën lles denegou a entrada, impedindo que se puidese avaliar o seu estado físico. Dende a CIG explican que tiveron que apelar ao código deontolóxico médico para forzar á empresa a permitir o acceso. Tras lograr o permiso levaron a cabo os pertinentes controis e análises e agora agardan polos resultados das probas.