Como sempre, a esquerda independentista participará ativamente na mobilizaçom, mas nesta ocasiom ainda com maior entusiasmo, ao representar umha confluência de luitas entre a convocatória sindical e a da Plataforma Nunca Mais.
É fundamental que se favoreçam dinámicas de confluência e unidade dos diferentes setores afetados pola multicrise atual, no caminho de levantar o povo trabalhador contra a opressom da burguesia e das suas instituiçons, nomeadamente o Estado espanhol e os patrons.
Porém, NÓS-Unidade Popular quer alertar novamente contra a manobra de confusom e manipulaçom que os responsáveis da crise, do desmantelamento progressivo do setor naval e da catástrofe do Prestige pretendem protagonizar, quando personagens como José Manuel Rei Varela e o seu governo local anunciam que querem somar-se à manifestaçom.
As vítimas das agressons nom podemos marchar juntas com os responsáveis das políticas que nos conduzírom aonde estamos e que nos impedem levantar cabeça.
O PP -e também o PSOE, agora na oposiçom- som corresponsáveis, já desde os anos 80 do passado século- da crise permanente da nossa comarca e de que hoje se situe no primeiro posto em percentagem de desemprego no conjunto da Península Ibérica.
A passividade do governo local de Rei Varela, cúmplice das políticas do seu partido nos governos espanhol e autonómico galego, nom pode ser maquilhada com visitas para pedir explicaçons ao SEPI, cuja direçom é eleita polo seu póprio partido, nem com grandiloqüentes palavras com as quais só tenta "salvar-se da queima".
Neste domingo, o povo trabalhador da nossa comarca deve dar exemplo de unidade e coerência, evitando cerimónias da confusom e aumentando a combatividade no caminho de derrubar o governo e impor umha ruptura democrática acompanhada da profunda mudança socioeconómica que a Galiza e Trasancos necessitam para sair da crise em que o PP, o PSOE e a sua ruinosa Espanha nos metêrom.
Com Espanha, Nunca Mais!
Polo direito a produzir, defendamos o setor naval público galego!
Contra a crise, unidade e luita popular!