Os traballadores e traballadoras da empresa Monte Kalamua (situada no parque empresarial San Cristovo, na localidade ourensá de Ribadavia) están a secundar masivamente tres días de greve (mércores 4, xoves 5 e venres 6 de setembro) en demanda do cobro dos salarios adebedados (na maioría dos casos xa suman catro nóminas) e para esixir unha mellora nas condicións de traballo.

A greve está a ser secundada pola práctica totalidade dos traballadores e traballadoras da empresa e, en especial polos encargados da produción, que se atopa completamente paralizada. Nos os días que dura o paro, o persoal permanece concentrado durante a mañá ás portas da fábrica.

Monte Kalamua, do sector de conxelados, dedícase ao corte e conxelado de peixe, nun proceso de produción e almacenamento. A oficina central atópase en Derio (Bizkaia), mais a fábrica está situada en Ribadavia e na actualidade conta con 33 traballadores/as.

As razóns da folga, explica Paulo Conde, da FGAMT-CIG Ourense, son fundamentalmente dúas: a reclamación do cobro dos salarios que lles corresponden aos traballadores e traballadoras e a mellora das condicións laborais. En canto aos atrasos salariais, a día de hoxe, a débeda esténdese a 4 mensualidades na maioría dos casos, incumprindo así as promesas e garantías que a empresa deu en multitude de ocasións de non superar as dúas mensualidades de débeda.

Un incumprimento que paradoxalmente coincide co feito de que estes últimos meses foron de máxima produción. Unha actividade "que definitivamente non se viu reflectida na diminución de dita débeda", denuncia Paulo Conde.

A respecto das reivindicacións nas melloras das condicións, dende a FGAMT sinalan as dificultades ás que enfronta o persoal para desenvolver as súas tarefas, xa que na factoría hai máquinas que non funcionan, maquinaria deteriorada, ausencia de coitelos, serras, etc. "Unhas duras condicións de traballo que xa causaron algunhas baixas", matizan.

Reparto de follas informativas por Ribadavia

O venres -última xornada de folga- está previsto un reparto de panfletos pola rúas de Ribadavia, para informar en primeira persoa á cidadanía da situación que están a vivir os traballadores e traballadoras desta empresa. Do mesmo xeito, Conde xa advertiu que a CIG non descarta convocar novas mobilizacións se non se producen movementos por parte da empresa destinados a solucionar estes problemas.