Denuncian que a empresa está acumulando cartos para solventar a súa situación a custo das traballadoras e traballadores.

Este xoves comezou a greve indefinida en Moure Pan S.L. logo de dous anos de falta de información, de despedimentos –que reduciron o cadro de persoal á metade- e tras catro meses consecutivos sen cobrar. A folga foi secundada polo 100% do persoal e os únicios que acudiron a traballar foron os donos.

A FGAMT-CIG asegura que a empresa está acumulando cartos para solventar a súa situación económica por mor do crédito que solicitou e que pretende pagar a custo das traballadoras e traballadores. Unha situación que, porén, a central sindical atribúe exclusivamente á mala xestión empresarial.

A CIG lembra que foi imposible levar a cabo negociación algunha porque a empresa rompeu todo contacto cos seus traballadores/as.

Advirte que Moure Pan S.L. non está facendo pan e que se se lle está servindo a alguén é doutra empresa. O persoal solicita ademais a solidariedade das/os clientes para poder así presionar con máis forza e que se lle dea unha solución ao conflito.