As e os congressistas da CIG som soberanos e tenhem a última palavra, mas todo indica que a central nacionalista aprovará neste fim de semana um relatório em que se defende explicitamente o abandono do euro.

No texto de debate afirma-se literalmente que "a recuperaçom das competências na política monetária por parte dos estados da Eurozona e a independência a respeito do Banco Central Europeu com a conseguinte saída do euro" se constitui como "a via mais acaída para rachar com a especulaçom da dívida", fenómeno que está a agravar a recesom económica no conjunto da UE.

O BCE nom está a cumprir o papel que deveria, financiar os Estados e nom a banca, pola "falta de vontade e interesse por parte de quem manda na UE", julga a central nacionalista.

A CIG completa a sua análise crítica da UE com o argumento de que a integraçom na Uniom tivo "nefastas conseqüências para Galiza e os nossos setores produtivos estratégicos e básicos".

A chave para superar a dependência da Galiza, nom só do Estado, senom também da UE, passa pola conquista da soberania, estima o relatório oficial da CIG.

"O exercício da soberania política nom é só um direito democrático coletivo indiscutível, senom que é a condiçom necessária para desenvolver o país em funçom das necessidades e dos interesses das classes trabalhadoras e para melhorar a qualidade de vida frente às políticas neoliberais que estám ao serviço das classes dominantes dos estados centrais e do capital transnacional", defende a central nacionalista.