Ao evento assistírom à volta de 50 empresas, que ofertavam supostamente 200 postos de trabalho, segundo informaçons da Concelharia de Emprego do Porrinho. Mas a realidade tirou à luz a ineficácia e inutilidade desta iniciativa, se a vemos fora das intençons propagandísticas do PP.

De todo o prometido, só 17 pessoas conseguírom um emprego, presumivelmente precário e mal remunerado.

Como escusa, o governo local do PP pretende maquilhar a sua incompetência em matéria de emprego e o fracasso estrepitoso da "feira", afirmando que "muitos dos postos ofertados nom se pudérom cobrir, já que respondiam a um perfil mui especializado, como torneiro-fresador ou administrativo, nom existindo candidatos/as para cobri-los".

Parece ser que o concelheiro de emprego, M. Alejandro Lorenzo, desconhece que estas especialidades contam com umha demanda laboral mui alta, ficando em evidência os escassos conhecimentos que possui sobre o mundo do trabalho.

No seu momento, denunciamos publicamente o marcado caráter propagandístico e populista da "feira", ao considerar que umha simple atividade de entrega de currículos, nom podia reverter as más práticas empresariais e a situaçom do desemprego na comarca.

Consideramos que o investimento económico realizado neste evento, assim como os 2.000.000 de euros que está a manejar a Concelharia de Emprego, facilmente poderiam ser utilizados na criaçom de postos de trabalho reais, ou para subsidiar as e os desempregados de longa duraçom, que suponhem a percentagem mais alta de todas.

De NÓS-UP queremos denunciar que parte das verbas orçamentais destinadas à criaçom de emprego, e que saem dos bolsos das/os contribuintes, estám a ser empregadas para subsidiar a empresas privadas mediante convénios de práticas, sem remuneraçom económica para os/as trabalhadores/as e prometendo contratos de trabalho fictícios na maioria dos casos.

Mais umha vez, achamo-nos em posiçom de afirmar que as políticas levadas avante polo governo do PP em matéria de emprego, longe de paliarem a situaçom que vivemos, ajudam a agravar ainda mais as conseqüências da crise capitalista.

O Concelho do Porrinho soma 2.812 desempregados/as, 188 mais que há tres meses, quando se realizou a "feira de emprego".

De NÓS-UP, manifestamos que a estas alturas nom podemos manter representantes políticos que nom pertençam à classe trabalhadora, já que defendem interesses opostos aos da maioria social galega, e som nocivos para a soluçom da crise socioeconómica que padecemos.

Polo futuro da classe trabalhadora e por saúde democrática, temos que botá-los.

Luitar com dignidade é a alternativa da mudança.

O capitalismo é a nossa ruína !!