O desemprego en Galiza suma e segue achegándose cada vez máis ás 300.000 persoas. No mes de febreiro rexistráronse un total de 292.823 desempregados/as, 2.033 máis que no mes anterior e 18.148 máis que no mes de febreiro de 2012. Os datos denotan ademais un preocupante descenso da actividade, xa que os contratos asinados diminuíron nun 24,36% respecto do mesmo mes do ano pasado e un 7,57% respecto de xaneiro. O desemprego acada cifras escandalosas, que aínda o serían máis de computarse as miles de persoas que tiveron que emigrar, durante este período.
A metade do total de desempregados/as rexistráronse na provincia da Coruña (1.067 máis respecto do mes anterior) e o sector máis castigado foi o de Servizos, onde se perderon 1.765 dos 2.033 postos de traballo destruídos no mes de febreiro.
Dos datos tírase unha situación laboral en Galiza, segundo afirma o secretario confederal de Emprego, Antonio López Rivera, "cada día máis alarmante" da que responsabiliza aos gobernos galego e central pola ausencia de políticas económicas que potencien os sectores produtivos, o que está a provocar "unha destrución masiva do emprego e un brutal deterioro da economía galega".
Rivera reitera o fracaso da reforma laboral. "Á vista dos datos está máis que demostrado que o seu único obxectivo é facilitar o despedimento e estragar as condicións laborais e de vida das persoas que aínda manteñen o emprego", di.
Ante isto, demanda que de inmediato se poñan en marcha políticas de investimento público e alerta de que canto máis tarden en facelo, máis difícil será recuperar a economía, salvar os sectores produtivos e crear emprego".