Representantes do comité trasladáronlle á Inspección de Traballo os incumprimentos da dirección da firma viguesa
Os traballadores/as da compañía viguesa Berbescon, dedicada á elaboración, transformación e comercialización de produtos derivados do peixe conxelado, volveron percorrer hoxe as rúas da cidade en manifestación para denunciar os incumprimentos da empresa e reclamar o pago dos salarios pendentes. A marcha rematou fronte á Inspección de Traballo, onde representantes sindicais e do comité de empresa mantiveron unha xuntanza co seu responsábel.
A marcha partiu ao mediodía da sede da firma, situada na zona do Berbés, e percorreu a Avenida de Beiramar até a Inspección de Traballo, na rúa Cánovas del Castillo. Durante o traxecto, os afectados/as berraron consignas esixindo o mantemento dos postos de traballo e o pago dos soldos que lles adebeda. A compañía ten pendente de pago tres pagas extras e media, a metade do salario de agosto e a nómina completa de setembro, ademais dos atrasos dende 2008.
Ao mesmo tempo, o comité de empresa (CIG, CCOO e UGT) denunciaron diante da Inspección os incumprimentos por parte da dirección con respecto á firma do Expediente de Regulación de Emprego (ERE), o que levou os representantes dos traballadores/as a convocar con anterioridade unha xornada de folga. En concreto, lembráronlle que na acta do ERE figuraba o compromiso de que a empresa tiña que cotizar as diferencias salariais dende o 2008 e actualizar os soldos, que son os mesmos dende hai catro anos.
Dende a FGAMT-CIG explicaron que o responsábel da Inspección lles dixo que para solucionar o tema das cotizacións teñen que remitirlle un escrito formal, "pero que as outras cuestións eran xa materia do Xulgado do Social". Neste senso, lembran que as pagas extra e os atrasos xa foron levados aos tribunais. Finalmente, reclaman un plan de viabilidade para a empresa -que solicitou o concurso de acredores- que permita conservar os 90 postos de traballo.