Fotos da manifestaçom de ontem em Ferrol remetidas polo fotógrafo Susete para o Diário Liberdade

A resposta juntou milhares de pessoas, principalmente do setor naval, empregadas e empregados públicos e doutras empresas ameaçados na comarca de Trasancos, como Poligal, de Narom.

Sem polícias nem comício eleitoral do PP

A sonora e massiva manifestaçom tivo duas caraterísticas relevantes que convém salientar, para além do êxito de participaçom: coincidindo no horário com o iminente início do comício eleitoral do PP no Teatro Jofre, provocou a suspensom do mesmo, devido à importante revolta existente na maioria do povo contra o partido governante. O Partido Popular advertiu que vai evitar publicitar os seus atos públicos até umha hora antes do início, para evitar os protestos populares que estám a sofrer em diferentes pontos da Galiza e especialmente em Ferrol.

Por outra parte, e contrariamente ao acontecido em convocatórias anteriores, desta vez os sindicatos maioritários impugérom ao SUP e restantes agrupamentos policiais a sua exclusom da convocatória, como conseqüência da funçom abertamente repressiva demonstrada em datas recentes polas polícias espanhola e municipal ferrolana contra os trabalhadores e trabalhadoras que se manifestam de maneira constante nas ruas de Ferrol.

A violência contra obreiros e obreiras e mesmo as torturas aplicadas a um dirigente sindical polas forças repressivas nessa cidade recentemente, em resposta a um protesto popular diante da abertura da campanha eleitoral do PP em Ferrol, provocárom a indignaçom nas bases sindicais, mudando a atitude de toleráncia habitual com a participaçom dos repressores nas manifestaçons de trabalhadores e trabalhadoras.

Contra a crise no naval, os ERES em empresas da comarca e os cortes nos serviços públicos

De resto, a mobilizaçom confirmou a boa disposiçom do povo trabalhador para dar resposta nas ruas aos cortes de direitos impostos polos governos, com palavras de ordem constantes pola greve geral e contra os responsáveis pola atual crise. Foi determinante para o êxito da convcoatória a adesom de milhares de trabalhadores e trabalhadoras de Navantia em Ferrol que estivérom previamente fechados no interior dos estaleiros até se incorporarem à marcha convocada por todos os sindicatos representativos com presença na comarca.

Denunciou-se a propaganda do PP na hora de publicitar uns contratos com a firma mexicana PEMEX que estám ainda no ar e reclamou-se a plataforma flutuante comprometida.

Para amanhá, quarta-feira, está convocada umha outra grande mobilizaçom comarcal unitária em Trasancos, sob a palavra de ordem "Querem afundar a comarca. Impidamo-lo". Sairá às 20:00 da praça do Inferninho e prevê-se que volte a ser massiva.