O número de pessoas atingidas por esses expedientes, facilitados pola última reforma laboral, subiu na Comunidade Autónoma da Galiza (ficam fora da contagem as comarcas do leste excluídas da mesma polas instituiçons espanholas) até as 16.428. o que contrasta com as 11.472 registadas em idêntico período do ano 2011. Som dados do Boletim de Estatísticas Laborais do Ministério espanhol de Emprego.
No conjunto do Estado espanhol, o número de trabalhadores e trabalhadoras afetadas por EREs autorizados polas autoridades laborais ou simplesmente comunicados às mesmas, já que desde a última reforma laboral nom é precetiva qualquer aprovaçom, aumentou 55,3% nos sete primeiros meses do ano se comparado com o mesmo período do ano passado.
No caso da Galiza, o número de ERE autorizados ou comunicados ascendeu até 1.488, o que supom um aumento de 85,3% em relação aos sete primeiros meses do ano passado. Do total de trabalhadores afetados, 1.928 vírom-se incluídos num ERE de extinçom, um número 9,23% inferior ao do mesmo período de 2011.
Mais 10.667 trabalhadores vírom-se afetados por um expediente de regulaçom de emprego de suspensom, o que representa um aumento de 36,67%, enquanto 3.833 sofrêrom a aplicaçom de EREs de reduçom de jornada, o que supom multiplicar por 2,5 o número do ano anterior.
Deste modo, 64,93% das trabalhadoras e trabalhadores afetados por um ERE na Galiza entre janeiro e julho enfrentárom um expediente de suspensom, face a 11,74% que fôrom vítimas de um de extinçom e 23,33% que se vírom incluídos em EREs de reduçom de jornada.