Compostela, Ames, Corunha, Carvalho, Vigo... registárom paralisaçons de protesto incluindo nalguns casos cortes de tránsito e reivindicando o trabalho público e com direitos.
A iniciativa dos e das empregadas públicas fai parte de umha jornada que se completará à tardinha com grandes manifestaçons em todas as grandes cidades da Galiza, convocadas unitariamente polos sindicatos CIG, UGT e CCOO, com a adesom doutras centrais menores e o apoio de todo o espectro da esquerda política galega.
Os sindicatos da Funçom Pública da Galiza, CIG, CCOO, UGT e CSI-F, pediram ontem à Junta um adiamento da Mesa prevista para esta tarde, na qual o Governo do PP prevê explicar-lhes a as medidas restritivas que aplicará em breve, como a eliminaçom da paga extra de dezembro.
Os funcionários e funcionárias públicas acusárom nas concentraçons o presidente do Governo espanhol, Mariano Rajoi, e o seu companheiro e presidente da Junta da Galiza, Núñez Feijó, de serem "responsáveis polo saque do povo".
Tanto em Compostela como na Corunha houvo breves cortes de tránsito. O bater de caçarolas, apitos e palavras de ordem mostrárom o descontentamento crescente dos funcionários e funcionárias públicas galegas.
Ainda hoje, na parte da tarde, haverá nove manifestaçons "contra o saque do povo", nos seguintes lugares e horários:
Corunha: Às 20:00 h da Praça da Palhoça. Manifestaçom central.
Burela: Às 20:00 h da Praça da Marinha
Ferrol: Às 20:30 h do Inferninho
Lugo: Às 20:00 h da Ronda da Muralha, do prédio sindical
Ponte Vedra: Às 20:30 h da Praça da Ferraria
Santiago: Às 20:00 h da Alameda
Ourense: Às 20:00 h do Pavilhom dos Remédios
Vigo: Às 20:30 h da Vía Norte
Vila Garcia: Às 21:00 h da Casa do Mar
