Integrantes das plataformas de Ponte Vedra, Baixo Minho, Salnês, Vigo e Vale Minhor levárom as reivindicaçons sobre o calote das preferentes ao pleno da Deputaçom de Ponte Vedra, que preside Rafael Louçám, dirigente do principal partido protetor de Nova Galicia Banco nas instituiçons burguesas, o Partido Popular.
Foi no início da sessom, polas onze da manhá de hoje, que o presidente da Deputaçom, o direitista e espanholista Rafael Louçám, viu interrompido o seu discurso, levantando-se os atingidos pola extorsom bancária, ao grito solidário de 'Todos somos Júlio Vicente', em alusom ao porta-voz dos e das afetadas do Rosal, que ontem foi insultado polo dirigente do PP, que lhe chamou 'provocador nato'.
A "provocaçom nata" chegou por parte do próprio Louçám quando, imitando os deputados provinciais do PSOE e do BNG, vestiu a t-shirt cor de laranja que identificava o grupo que ocupou a sede da instituiçom. A resposta das pessoas concentradas foi reclamarem soluçons políticas já, em lugar de gestos de ocasiom para sair nos meios de comunicaçom.
A ocupaçom da Deputaçom provincial de Ponte Vedra prolongou-se durante toda a manhá desta sexta-feira. "Queremos o nosso dinheiro", repetírom os e as pessoas ocupantes da sala de plenos, que hoje representam as dezenas de milhares de famílias afetadas polo roubo das preferentes em toda a Galiza.
Foto: @diecisietecosas
