De NÓS-UP seguimos com atençom todos os passos dados polas três partes que possibilitariam o desbancamento de Solha e da sua banda da Cámara Municipal. E dizemos banda, porque nom som outra cousa que umha banda de corruptos que acumulam irregularidades e delitos empobrecendo a maioria social do Concelho.
Quando a posiçom do BNG foi rachar com as negociaçons, parabenizamos informalmente ao portavoz local da vossa organizaçom por esse passo. Porém, semelhou nom gostar dos parabéns, transmitindo a sua aposta por fazer-se com a alcaldia de Ponte Areias.
Os nossos parabéns estavam enquadrados no novo cenário de giro político do BNG, que vem de aprovar a aproaproximaçom às teses que NÓS-Unidade Popular defende para Galiza desde a sua fundaçom: a defesa da soberania nacional e umha política mais radicalmente de esquerda e em defesa das mulheres. O giro abre cenários de colaboraçom na defesa da soberania nacional e de medidas económicas e sociais em benefício do Povo Trabalhador Galego.
Para construir um movimiento em defesa dos interesses da Galiza, há alianças que devem ser descartadas. Há que delimitar os campos entre quem estamos pola construçom dumha pátria libertada e quem nom. Assim, hoje estades num bom momento para começar a trabalhar com a vista posta num futuro nosso e abandonar desde já alianças com o PSOE. Isto pode supôr caminhar em solitário algum tempo e retrassar a obtençom do governo/s local/locais, mas para obter a fotografia da Galiza livre que anelamos, há que levar a cabo um delicado processo de revelado evitando qualquer contaminaçom.
A presença de ACIP no tripartito suporia reincorporar ao novo governo a umha parte do mesmo velho cancro que se quere deitar forapor meio da moçom. Poderia argumentar-se que estariamem minoria (argumento discutível no reparto patuado: 3 BNG, 2 ACIP e 2 PSOE). E que as manifestaçons de confiança em Carrera lançadas nos meios -quem só é mais um capo da política local- poderiam ser só gestos na procura do desejado final com moçom de censura. Mas as recentes fotografias de Carrera e Raquel Bautista à mesa com Pepe e Nava Castro em Mondariz Balneário, falam por sim mesmas.
Além disso, é também vox populi que Solha ameaçou a Delfim Fernández, do PSOE, com "retirar todos os seguros que lhe tenhem na sua clínica médica Clínica Condado". O PSOE é o pior parado nos resultados das eleiçons municipais de 2011 e é quem mais tem a ganhar jogando a carta da possível moçom tendo em conta todo o respaldo mediático e económico que pode obter via Madrid ao ser umha das duas patas do bipartidismo espanhol.
As contas do BNG, as vossas contas, bem poderiam ter sido: patuamos com ACIP e PSOE ostentando nós a presidência da Cámara, com o qual os flashes e o protagonismo nos meios vai ser principalmente para Represas e por tanto para o BNG. Pouco que objetar a essa tática política que poderia reforçar o Bloque de cara aos próximos comícios, de nom ser porque o próprio Represas advertia de que ia ser necessária a adoçom de "medidas impopulares e até contrárias ao seu programa".
Como conclussom, queremos transmitir a nossa satisfaçom por nom ter-se produzido a moçom de censura. Solha e a sua banda devem afundir com o barco e a esquerda nacional trabalhar para que paguem o preço nas urnas. Satisfaçom partilhada com boa parte da vossa base social, tanto de filiaçom como de militantes e também cargos públicos. Sabemos que muitas e muitos de vós ainda estades em estado de shock pola possível obtençom da presidência da Cámara com o apoio de ACIP.
A mobilizaçom popular é a garantia mais fiável para evitar o governo de quem rouba com total impunidade. Também o é para construir um grande e forte movimento, plural e combativo que no país é aínda tarefa pendente. Com vontade e coragem podemos caminhar face a constituiçom dumha Gestora Popular para o Concelho de Ponte Areias. Nós apoiaremos com todas as forças esse caminho.
Assembleia Comarcal de NÓS-Unidade Popular do Condado
Ponte Areias, 25 de abril de 2013
