Numerosos asalariados da Xunta, principalmente aqueles que están contratados con asistencias técnicas ou aqueles contratados directamente por algún director xeral ou conselleiro estan realizando informes e argumentarios para ser utilizados durante a campaña electoral polo Partido Popular.

A Xunta atópase, desde o anuncio do adianto electoral feito por Núñez Feijóo, en servizos mínimos. Por iso, e segundo confirmou GC de fontes do propio Goberno galego, moitos dos cargos de confianza de conselleiros e directores xerais están realizando labores "máis propias dun partido político que do propio executivo".

A moitos deles encargáronselle elaborar informes e argumentarios sobre temas sensibles das políticas da Xunta que poidan utilizar os partidos da oposición durante a campaña electoral. "Hai moitos nervios e todo vale para afrontar unha precampaña que se presume moi dura", apunta un destes traballadores.

Conselleiros políticos

E son, principalmente os departamentos de máis contido político e cuxos conselleiros teñen un gran peso político no PPdeG os que máis están traballando nestes informes; Educación e Cultura, Política Territorial e Medio Ambiente, Sanidade e Presidencia.

Pero son, precisamente, os asesores do presidente galego os que máis enfocados están nesta tarefa, especialmente agora que Feijóo xa comezou a precampaña con entrevistas e numerosos actos electorais.

Foto: LD