Coletivos de pessoas afetadas polo calote das preferentes já advertírom que ia ser umha campanha eleitoral 'movimentada' pois nom iam permitir esquecer ao PP a sua responsabilidade numha estafa que só na Galiza afeta a cerca de 100.000 pessoas. Souto Maior, é o sitio escolhido tradicionalmente polo PP para dar início ao ano político, e assim o fam também neste 1 de setembro, com Mariano Rajoi e Feijoo de protagonistas. Mas a presença de centos de pessoas afetadas polas preferentes às portas do lugar onde ia decorrer o ato, obrigou o PP a mudar o guiom.

Dúzias de agentes de choque da Guarda Civil estabelecêrom um cordom policial, realizando mesmo cargas contra as e os concentrados. As pessoas que protestavam levavan apitos e faixas em que responsabilizavam os presidentes do PP de serem cúmplices do engano. Cumpre lembrar que no conselho de ministros desta sexta, o PP aprovou que a quantidade roubada polos bancos pudese chegar a 70% do investido polas e polos aforradores.

Direita espanhola preocupada

No PP reconhecem estar preocupados polos efeitos eleitorais do calote das preferentes, pois dam por sentado que grande parte destes milheiros de pessoas nom vam votar neles, ao responsabilizá-los da situaçom.