No caso de Ferrol, temo-lo mais que comprovado, vendo por exemplo como se malgastam milhares de euros em financiar atividades religiosas (70 mil na última Semana Santa), enquanto se abandonam os setores sociais mais necessitados do apoio dos poderes públicos.

Assistimos nestes dias a mais um caso flagrante de um malgasto tam injustificado como significativo. Trata-se da entrega a fundo perdido de 229.500 euros a umha empresa desportiva de caráter privado, o Rácing de Ferrol, obrigando a que todos os ferrolanos e ferrolanas sufraguemos os gastos correntes derivados das atividades dessa empresa em instalaçons públicas como o estádio da Malata.

Queremos contrapor semelhante malgasto dos escassos recursos públicos disponíveis com um outro dado significativo: a reduçom radical de ajudas à antidade social sem fins lucrativos que no nosso concelho desenvolve projetos sociais no ámbito da luita contra a SIDA. Recentemente, a associaçom Lazos denunciou a reduçom de 70% das ajudas de pouco mais de 3 mil euros que vinha recebendo anualmente por parte da instituiçom municipal ferrolana.

Em tempos de suposta austeridade e reduçom do gasto público imposta polo governo espanhol, tam indignante nos parece a assunçom acrítica dessa injusta directriz, como a contradiçom de desviar ao mesmo tempo centenas de milhares de euros anuais para umha empresa privada que fai negócio no ámbito do desporto-espetáculo e que, contrariamente ao que afirmam José Manuel Rei Varela e o PP, realizam um escassíssimo labor no desporto de base local. A isso devemos acrescentar um facto que Rei Varela parece esquecer: o público que utiliza as instalaçons da Malata, incluído o que assiste aos jogos do Rácing, já paga polo uso das mesmas, nom vale agora vir dizer que o povo de Ferrol tem que pagar para a manutençom dessas instalaçons.

Nom menos significativo é o silêncio da oposiçom institucional, que mantém um silêncio cúmplice seguramente lembrando que todos os partidos representados no Concelho de Ferrol já governárom e entregárom igualmente dinheiro público a essa mesma empresa. Se em todos os casos é mais que criticável essa política de financiar o desporto espectáculo com o dinheiro de todos e todas, mais ainda numha situaçom de emergência como a atual, com cortes de serviços públicos constantes por pate dos diferentes governos, incluído o municipal de Ferrol.

NÓS-Unidade Popular denuncia os dous pesos e duas medidas utilizadas polo governo do PP em Ferrol e compromete o seu empenho em luitar pola derrota das políticas aplicadas polos principais partidos do sistema contra o nosso povo.

Assembleia Comarcal de NÓS-Unidade Popular em Trasancos

Ferrol, 30 de agosto de 2012