O alegado cabecilha do ramo galego da rede de narcotráfico é José Álvarez-Otero Lorenzo, de 57 anos, sargento da Guarda Civil destinado em Estella (Navarra), após trabalhar durante mais de umha década como comandante do posto de Corcubiom. Atualmente de baixa, quando foi detido na passada terça encontrava-se em Corcubiom acompanhado do seu filho, comandante do posto da Guarda Civil de Cee e Arouça. Também foi detida umha pessoa em Cee e outra na Arouça.

Narcotráfico a partir do posto de Corcubiom

Nom é a primeira vez que guardas civis destinados em Corcubiom se vem envolvidos em redes de narcotrafico. Em 2001, umha operaçom anti-narcotráfico por um caso similar, o do Chad Band, umha goleta inglesa carregada de 3000 kilos de háxixe com destino à Galiza, deu em várias detençons no País, entre as quais se contavam as de vários funcionários "antidroga". Um deles foi o de Juan Carlos Casal Maseda, comandante do posto da Guarda Civil de Ordes, que se encontrava -também- de baixa em Vimianço no momento da detençom. Antes estivera destinado em Cantábria, onde por problemas estivera separado do instituto militar espanhol. Em 1992 chegou como sargento ao posto de Corcubiom e, posteriormente, Ponte Cesso e Ordes. Um elemento que participara em operaçons contra-insurgentes e que se mostrava orgulhoso de ter nascido num quartel da Guarda Civil.

Para se defender nos interrogatórios de ter empregado matrículas falsas, alegou que era umha medida de segurança perante a possibilidade de que a ETA atentasse contra o quartel de Ordes. Solicitaram-lhe quatro anos e dous meses de cadeia, 3.900.000 euros de multa e 15 anos de inabilitaçom: Casal Maseda seria o responsável de pedir a outro acusado que atuasse como ligaçom do agente do Serviço de Vigiláncia Aduaneira para que a droga entrasse sem perigo. Finalmente, as más práticas do juíz instrutor Vázquez Taín, que conseguiu provas de jeito ilegal, declarárom nulas as investigaçons, ficando Casal Maseda em liberdade.