Nos últimos oito meses, e em resposta à perseguiçom que padece particularmente a esquerda independentista, assim como a destruiçom sistemática da sua propaganda e vozeiros informativos por parte do serviço de limpeza municipal seguindo diretrizes do Nelson, a nossa organizaçom apresentou moçons ao pleno do concelho, e elaborou denúncias públicas, solicitando espaços comuns para a informaçom das forças políticas e dos movimentos sociais.
Estamos convencid@s, pois, que as pressons exercidas por NÓS-UP fôrom determinantes para que a Cámara adota-se esta decisom.
A medida aplicada polo governo do PP semelha um avanço nas liberdades democráticas no nosso concelho, mas o certo é que a colocaçom dos painéis pretende servir de escusa para acoutar e limitar as zonas de livre expressom.
Nelson anuncia sançons
Recentemente o Faro de Vigo informava sobre a imposiçom de sançons económicas por parte do concelho do Porrinho a várias pessoas, por realizarem pintadas em muros que nem sequer som de propriedade municipal, nem som elementos urbanos.
Rejeitamos energicamente qualquer sançom contra a juventude e a vizinhança que exerce um direito universal inalienável.
Embora o alcaide Nelson Santos faga alarde de oportunismo político, pretendendo mostrar-se agora como um bom democrata, já o conhecemos. Nom esquecemos que foi ele quem elaborou esta ordenança municipal, autoritária e restritiva.
Aduce desluzimento da vila por mor das pintadas, quando na realidade o que lhe dá pánico é a participaçom popular e a crítica. Para NÓS-UP o verdadeiro desluzimento provocam-no as dúzias de prédios em construçom parados pola especulaçom urbanística e apodrecendo com o tempo, quando a centenares de jovens lhes é negado o direito a umha vivenda digna.
Denunciamos pois, umha intencionalidade oculta na instalaçom dos painéis, insuficientes em todo caso, já que o PP quer condicionar assim o direito à liberdade de expressom, e circunscreve as zonas ao seu antolho. Apoiando-se numha ordenança ilegítima Nelson Santos reserva-se a potestade de reprimir direitos fundamentais. Questom que nom podemos permitir.
Portanto NÓS-UP exige de imediato:
1º Derrogaçom dos artigos da ordenança municipal que atentam contra a liberdade de expressom. ( Artig. 21 pontos 1 a 5 ).
2º Cessamento dos labores repressivos e de controlo social exercidos pola policia local.
3º Retirada de todas as denúncias em curso por exercer a liberdade de expressom contra ativistas sociais e militantes do movimento popular.
4º Fomento do associacionismo e da participaçom social permanente, destinando fundos do orçamento anual às organizaçons populares. Assim poderám transmitir o seu projeto e alternativas à sociedade, mediante a ediçom de vozeiros, jornais e outros meios de comunicaçom audio-visuais.
5º Criaçom de umha Televisom Pública, e restruturaçom da Rádio Municipal para a livre expressom da vizinhança, cuja programaçom inclua espaços próprios das organizaçons que assim o solicitem.
Por um Porrinho livre de inquisidores!!
Repressom nunca mais!!