Lores qualificou de "êxito económico e pulo para a projeçom internacional da cidade" de Ponte Vedra a passagem da "Vuelta a España" pola cidade, enquanto se manifestava"encantado polo entusiasmo" com que se acolheu a cita desportiva em bicicleta. Apesar de que nela só compete um corredor galego, apesar de ser umha prova excludente da sua versom feminina, e apesar dos históricos posicionamentos do soberanismo galego contra a utilizaçom do nosso território como parte dumha competiçom promotora da marca Espanha, Lores alinha-se com os discursos postmodernos que pretendem transcender o que denominam ideias caducas e mensagens prefabricadas: a consciência irrebatível de que o desporto espetáculo é umha poderosíssima ferramenta de consolidaçom do espanholismo, máxime na atualidade após os sucessivos êxitos desportivos no futebol e basquete, principalmente.

Nom esqueçamos que Ponte Vedra é a cidade galega que acolhe, ainda, a festa taurina mais exitosa de toda a nossa geografia.

Lores é um exemplo tangível de como o BNG e o nacionalismo galego em geral tem percorrido um longo caminho, em nom muitos anos, desde a intransigência com a bandeira inimiga espanhola (por cuja queima fora condenado o até há poucos meses secretário geral da UPG), à assimilaçom como força política e projeto social transformador que nom só coexiste, mas promociona e se recreia na conivência com o poder estatal.

BRIGA, como organizaçom juvenil preocupada com a promoçom do desporto como instrumento chave dumha sociedade emancipada, sá e coesa, adere ao rechaço que já tenhem manifestado nas últimas semanas outras entidades a que Galiza seja um divertido paradiso exótico e folclórico para eventos desportivos negadores da nossa identidade nacional.

FORA A "VUELTA" DA GALIZA!

Foto: Briga