Durante dous dias, duas representantes da Mesa Nacional da nossa organizaçom participárom dum intenso e frutífero programa de atividades, encontros e atos políticos que culminárom com a histórica jornada mobilizadora que Barcelona acolheu o 11 de setembro.
A agenda começava o dia 10 com a visita ao Parlamento de Catalunya onde companheiras da CUP nos explicárom como realizam o seu trabalho e intervenhem na esfera da política institucional. Após jantar no popular bairro de Grácia junto a delegaçons de ARRAN, Jaleo!!!, Yesca, Purna, Ernai e Isca!, mantivemos um encontro todas nós para dar continuidade à dinámica internacionalista "Somos o vosso pior pesadelo", que coordena forças desde os distintos povos que partilhamos Espanha como marco de dominaçom.
Às 19h, a companheira Eva participava da manifestaçom da esquerda independentista em Sabadell onde interviria no ato político final para transmitir em nome de BRIGA, o apoio da juventude rebelde galega ao processo soberanista catalám.
Posteriormente, em Barcelona participamos no ato de "Som Països Catalans" em El Fossar de les Moreres que foi seguido da popular "Marxa de Torxes" polas ruas da capital do Principat, pondo assim final à agenda da véspera da Diada que já se intuía histórica.
O 11S amencia com o centro da cidade repleto de faixas, pintadas e murais da juventude da esquerda independentista que soubo fazer um enorme labor agitativo, visualizando nas ruas o conflito existente nos Països Catalans nom só com Espanha, mas também com o Patriarcado e o Capital.
O dia começava com a homenagem a Gustau Muñoz, jovem assassinado pola polícia o 11 de setembro de 1978.
Umha vez rematado, dava começo a manifestaçom juvenil convocada por ARRAN e na que centos de jovens reafirmárom a sua aposta por uns Països Cataláns reunificados, livres, socialistas e feministas. Umha colorida e combativa mobilizaçom que finalizou com o ato político no que intevinhérom duas companheiras de Ernai e BRIGA em representaçom dos povos oprimidos polo Estado espanhol. As jovens basca e galega transmitírom a importáncia da solidariedade internacionalista como um ato consciente e de tenrura entre povos, carente de qualquer oportunismo e necessário para combater um inimigo comum. Manifestavam assim o apoio dos povos galego, asturiano, basco, aragonês, castellano, andaluz e canário ao projecto juvenil da esquerda independentista catalana e ao processo de rutura com Espanha que se tem iniciado em Catalunya.
Nada mais rematar o ato central juvenil, começava a mobilizaçom convocada por Rescat solicitanto liberdade e amnistia para as presas políticas e na qual também participamos.
Após jantar junto às delegaçons internacionais, estivemos presentes no histórico "V" que afogou as intoxicadoras vozes da imprensa espanholista e deixou clara a maioritária vontade do povo do Principat de configurar um Estado próprio independente de Espanha.
Umha Catalunya que nunca será verdadeiramente livre de nom quebrar também com a imposiçom do Patriarcado e o Capital; mensagem que ficou clara na multitudinária manifestaçom da esquerda independentista que começava às 18h. Durante quase três horas, arredor de 50.000 pessoas apelavam à desobediência para conquistar a independência aceite Espanha ou nom. Já no ato político final manifestavam de forma contundente a sua vontade de continuar a luitar por uns Països Cataláns independentes, socialistas e nom patriarcais.
Rematava assim umha Diada histórica e determinante para o povo catalám que na Galiza também foi apoiada com um digno ato simbólico no que se realizou um "V" na praça da Quintana em Compostela.
De BRIGA, estamos enormemente orgulhosas de ter estado presentes no 11S acompanhando e partilhando experiências com as jovens da esquerda independentista catalana.
Desde aqui transmitimos o nosso agradecimento a ARRAN polo trato recebido e reiteramos o nosso apoio internacionalista à luita independentista, socialista e feminista do povo catalám e em especial à sua juventude rebelde.
VIVA A SOLIDARIEDADE INTERNACIONALISTA!
VISCA LA TERRA!
VIVA A GALIZA CEIVE!
