O encontro versou sobre a atual situaçom de emergência nacional, a necessidade das unidades de açom soberanista em construçom e a agudizaçom da repressom política.
Causa Galiza valoriza positivamente este encontro, dum modo genérico, tanto pola diagnose compartilhada sobre a gravidade da situaçom sócio-económica e política e as suas perspetivas involutivas, quanto polo facto de se abrir um canal de comunicaçom estável entre ambas formaçons e se procurarem pontos de encontro e iniciativas comuns num marco geral de reconhecimento das diferenças táticas e estratégicas existentes e da autonomia de projetos.
Centralidade da soberania
A reuniom contribuiu a assentar a centralidade da reivindicaçom da soberania política e a independência nacionais como únicas vias estratégicas possíveis para a mudança do modelo económico de dependência colonial, assim como a urgência de impulsionar iniciativas amplas que, ante a perspetiva dumha Segunda Transición, coloquem na agenda política este objetivo, a acumulaçom de forçaspara a rutura democrática e o processo constituinte galego.
Neste sentido, as duas delegaçons concordárom na existência por parte do Estado dumha operaçom política que pretende varrer o soberanismo do mapa político nacional como expressom real e concreta de oposiçom ao regime, substituindo-o por fórmulas espanholistas presuntamente de esquerda que, na sua praxe, defendem um modelo unitário de Estado com o apelido "federal" e som historicamente co-responsáveis da situaçom atual.
Dia da Pátria 2013
A delegaçom de Causa Galiza expujo o interesse de que, no contexto atual, o Dia da Pátria encenasse já e socializasse ao máximo nível as dinámicas de unidade de açom que se estám a gestar entre distintas individualidades e agentes sociais, sindicais e políticos soberanistas, lançando umha convocatória supra-partidária sob parámetros soberanistas e de rutura democrática.
A delegaçom do BNG, embora anunciou que reavaliaria a sua posiçom inicial,mantivo umha visom diferente desta questom e valorizou que, ainda, nom existiam as condiçons organizativas e políticas em 2013 para materializar no 25 de julho o novo clima político nacionalista, desejando que sim se dessem mas para 2014. Por sua parte, Causa Galiza impulsionará nas próximas semanas os contatos necessários para impulsoniar a celebraçom desta convocatória soberanista e supra-partidáriaque é maioritariamente exigida polas bases sociais soberanistas.
Repressom, solidariedade e espaços para o encontro
Causa Galiza transmitiu ao BNG a sua satisfaçom e reconhecimento pola positiva evoluiçom que nos últimos meses se produziu nesta formaçom a respeito da solidariedade com os e as independentistas retaliados e retaliadas e a denúncia da repressom. Neste ponto, a nossa delegaçom convidou à do Bloco a seguir aprofundando neste sentido deixando atrás práticas erróneas umha vez que, à margem do debate político nacionalista, "há espaço para o diálogo e os encontros na denúncia da repressom".
Este mínimo comum denominador dos sectores soberanistas e independentistas situa-se da ótica de Causa Galia por volta da reivindicaçom dos direitos legais e humanitários dos presos e presas independentistas –repatriaçom, suspensom do encarceramento sem juízo, condiçons higiénico-sanitárias, etc.-, assim como na denúncia do processo repressivo que agora se está a gestar contra sectores independentistas galegos nos tribunais espanhóis de excepçom e pode ter no juízo a celebrar em Madrid nos dias 24 e 25 de julho um importante ponto de inflexom.
Canal de comunicaçom aberto
Ambas delegaçons soberanistas acordárom dotar de carácter estável e periódico à via de comunicaçom inaugurada neste sábado, fazendo dela um foro de intercámbio de informaçom, diagnósticos e construçom de acordos e iniciativas comuns em defesa do País, da rutura democrática e da soberania nacional.
