A coordenadora constituinte surgida de Causa Galiza continua a convocar assembleias comarcais. Estám encaminhadas a "converter-se em organizaçom política assemblear de ámbito nacional". Isso acontece após um processo de re-estruturaçom da plataforma nos últimos meses, em relaçom a profundas mudanças no quadro nacionalista e independentista galego que  tivérom importantes consequências para Causa Galiza.

Na próxima quinta-feira, 14 de fevereiro, às 20:00 h. no centro social Revolta de Vigo, haverá umha reuniom convocada pola Coordenadora, e também no próximo sábado 16 de fevereiro às 17:00 h celebrar-se-á umha assembleia informativa sobre o processo constituinte no pub Small de Ogrobe, comarca do Salnês.

A chamada Coordenadora Constituinte do Projecto Independentista (CCPI) convida todas e todos os independentistas da comarca interessados na potencializaçom do processo constituinte a assistir a assembleia da sua comarca. Ambas as reunions terám como objetivo, além de dar a conhecer o projeto às pessoas interessadas, pôr em comum o estado dos contatos e assembleias a nível nacional e abrir os debates contidos no rascunho aberto que apresentou a Coordenadora no passado dia 20 de janeiro.

Precisamente ontem, dia 11 de fevereiro, realizou-se umha assembleia com idênticos objetivos em Compostela, além de algumhas outras em diferentes comarcas do País nas semanas anteriores.

Com o processo, a CCPI visa desenvolver "um extenso plano de contatos com dezenas de independentistas galegos e galegas interessadas na tarefa proposta" e gerar assim "umha vaga de ilusom, participaçom coletiva e compromissos com o processo e os seus objetivos, abrindo portas e janelas a todas as pessoas que desejarem achegar os seus esforços e impulsionar o projeto independentista".

Foto do Diário Liberdade - Manifestaçom de Causa Galiza em Compostela no passado Dia da Pátria.