A decisom, que resulta do processo de reflexom desenvolvido nestas semanas, pretende dotar à reivindicaçom da independência e o socialismo dum projecto político amplo, ilusionante e capaz de materializar umha prática efectiva nesta direcçom.
Assim, umha Comissom Nacional a escolher a curto prazo, com responsáveis permanentes de Organizaçom, Comunicaçom e Finanças e enlaces comarcais, encarregará-se de executar duas tarefas. Em primeiro lugar, afortalar a base territorial do processo, comprometendo dezenas de independentistas a participarem nel em toda a naçom. Por outra, definir os marcos, tempos e linhas mestras do mesmo, que concluirá com a Assembleia Nacional Constituinte do novo projecto político para a primavera.
Adoptamos esta decisom com a conviçom de que, neste momento de crise do Estado, ascenso da mobilizaçom social e tensionamento das contradiçons no país, é ainda mais necessário do que sempre articular um projecto sócio-político independentista aglutinante e capaz de intervir na realidade nacional e comarcal. Pretendemos contribuir assim a dotar de referência política e edificar um movimento de rutura com Espanha que vaia além dos exercícios tácticos de simulaçom, o oportunismo e as alianças contra-natura que hoje proliferam no campo nacionalista galego.
Esforço colectivo
Som evidentes as dificuldades que entranha um processo das características do proposto. A magnitude do esforço intelectual e militante necessários para construir umha ferramenta e umha estratégia realmente úteis para impulsionar o processo de liberaçom nacional e social vacina esta rede nacional de militantes contra as tentaçons da prepotência ou o isolamento: o trabalho que temos por diante requer o concurso dos braços e cérebros dispostos a edificar este projecto e estratégia ruturistas de liberaçom nacional e social.
No complexo contexto sócio-político actual, em que a necessidade e as oportunidades para o desenvolvimento na sociedade galega dumha proposta nitidamente independentista e revolucionária se tornam ainda mais significativas, de Causa Galiza queremos transmitir esta vontade de integraçom e construçom colectiva para alcançar o sucesso dos objectivos que hoje nos propomos.
Abrir portas e janelas
Neste sentido, Causa Galiza visa desenvolver um extenso plano de contactos com dezenas de independentistas galegos e galegas interessadas na tarefa proposta e gerar assim nas próximas semanas umha vaga de ilusom, participaçom colectiva e compromissos com o processo e os seus objectivos, abrindo portas e janelas a todas as pessoas que desejem achegar os seus esforços e impulsionar o projecto independentista.
