Liquidaçom das expectativas de soberanismo progressivo através da via estatutária, recentralizaçom competencial e financeira, entrada numha fase de grave recessom sócio-económica e resgate, crise integral do Estado espanhol, processos independentistas em Euskal Herria, Principat de Catalunya e vários países europeus, movimentos confusos de recomposiçom no campo nacionalista galego, etc.
Neste contexto tam dinámico, e depois de fracassar a tentativa de articular com outros sectores um "novo projecto comum para a liberaçom nacional e social", é tempo dumha análise e debate sereios e sossegados tanto do passado recente e a nossa trajectória, como da situaçom actual e dos futuros desenvolvimentos de Causa Galiza. Rectificar e remodelar o que consideremos necessário para continuarmos no vieiro iniciado em 2007. É este o processo em que se encontra neste momento a que, até hoje, foi umha iniciativa popular pola autodeterminaçom.
Debate aberto e profundo
A readequaçom de Causa Galiza a um complexo cenário que muta a velocidades vertiginosas e exige respostas rápidas precisa tempo, profundidade e participaçom colectiva. Neste sentido, as últimas semanas servírom para que a nossa iniciativa definisse os peares dum processo rigoroso de discusom interna, ao que queremos convidar tod@s @s independentistas cientes da necessidade estratégica de articular um projecto útil para avançarmos na liberaçom nacional e social da Galiza neste contexto mais do que nunca.
Así, este processo produzirá-se a grandes traços em três fases e dous ou três meses que sintetizaremos em 1º análise da nossa trajectória recente, da conjuntura actual e fixaçom da eventual posiçom de Causa Galiza ante o 21-O; 2º reformulaçom política e organizativa de Causa Galiza à luz da conjuntura actual e das recomposiçons acontecidas no campo nacionalista galego e, por último, 3º constituiçom formal do novo projecto independentista e abertura dum novo ciclo de intervençom social e política no processo aberto em 2007.
Participaçom plural
O processo que reformulará as funçons, modelo organizativo, linha de intervençom, política de alianças, etc. de Causa Galiza encontra-se aberto àqueles homes e mulheres galegas interessadas em construir um projecto independentista e socialista operativo na realidade quotidiana da Galiza e capaz de articular com efectividade forças soberanistas e independentistas. O vieiro está aberto e, neste sentido, por parte da iniciativa contactará-se com dezenas de pessoas no país para difundir os documentos de debate e ampliar a base que participará neste processo.
O primeiro Plenário Nacional para iniciar o novo ciclo celebrará-se no próximo 7 de Outubro na capital galega em hora e lugar que comunicaremos com a devida antelaçom. As sucessivas datas iremo-las comunicando através do nosso portal, as redes sociais e o contacto directo com a militáncia independentista em distintas comarcas da naçom.
