A convocatória do Dia da Pátria 2012 coincide com dous factos destacáveis: por umha parte, a agudizaçom da crise sócio-económica e política, que se substancia na multiplicaçom dos ataques do Estado espanhol às conquistas sociais, a pauperizaçom de setores crescentes da nossa sociedade e a voadura controlada do Estado de las Autonomías. Por outra, os confusos processos de reordenaçom e recomposiçom que vive o campo nacionalista galego (“giro soberanista” do BNG, recente constituiçom de ANova, movimentos do mapa independentista tradicional, etc.) que se exprimirám em distintas convocatórias deste 25-J.

Existe pois umha contradiçom evidente entre a necessidade de construir amplas unidades de acçom que tenham a sua cerna nos setores nacionalistas e soberanistas de esquerda para respostar nas ruas à grave conjuntura atual e a extrema fragmentaçom e desorientaçom política existentes. O campo nacionalista galego, que em todas as suas expressons girou face a posiçons soberanistas e independentistas no último lustro, transmitirá neste 25-J esta atomizaçom e ausência dumha proposta e umha estratégia soberanista unificadas.

Reforçar neste 25 de julho a aposta na soberania nacional

Nom é pretensom de Causa Galiza contribuir com a sua convocatória para fragmentar e desmobilizar os setores soberanistas e independentistas, mas, ainda assim, à vista da conjuntura, decidimos manter a convocatória anual de mobilizaçom que realizamos desde 2007, à vez que constatar a necessidade de construir depois do 25-J unidades de açom amplas dos setores nacionalistas e soberanistas neste contexto de emergência nacional e tender a mao para a sua materializaçom.

A decisom de convocar o Dia da Pátria deriva de duas constataçons: por umha parte, a inexistência de elementos de análise sólidos e vias de diálogo efectivas que permitam verificar o giro soberanista que diz impulsionar a direcçom histórica do BNG. Por outra, as incertezas que apresenta o projecto político nascido em 14 de julho, com escassa clarificaçom do seu perfil e política de alianças. À vista destes dados, Causa Galiza acha necessário manter a tradicional convocatória soberanista e independentista, continuar com a a acumulaçom de forças nesta direçom e tender a mao a todas as unidades de açom possíveis entre setores nacionalistas, soberanistas e independentistas de esquerda.

Foto: Galiza Contrainfo - Manifestaçom de Causa Galiza em Ferrol, 6 de dezembro passado.