O generalizado desleixo insititucional perante o rico património histórico-cultural galego é mais umha vez compensado polo ativismo popular: um grupo de vizinhas e vizinhos localizou o monumento megalítico, de grandes dimensons, que vem confirmar a riqueza da área onde apareceu este "novo" dólmen pré-histórico.
Formada por sete grandes chantas de dous metros de altura em forma circular, esta "cova dos mouros" era conhecida pola vizinhança de Burês, mas nom tinha sido catalogada, numha zona onde há outros monumentos semelhantes, se bem nom tam grandes.
A anta, coberta pola mámoa originária, mantém em pé boa parte do túmulo milenar, se bem lhe falta a laje superior horizontal que até algum dia cobriu as grandes pedras verticais, que ainda formam o maior dólmen da Barbança, terra rica em monumentos megalíticos.
O monumento foi redescoberto, já que de facto está espoliado, o que deixa claro que tinha sido achado previamente, para além de ser lugar de jogo das crianças da zona.
O achado confirma a grande riqueza histórica-patrimonial ainda por descobrir na Galiza, onde existe um abandono institucional inaudito, que em nom poucas ocasions permite a destruiçom de monumentos para a construçom de obras públicas ou mesmo privadas.
A Junta da Galiza recebeu a comunicaçom sobre a existência deste tesouro patrimonial. Resta comprovar o interesse que a informaçom desperta na instituiçom autonómica.
Mais informaçom no site de Rabunho Rexeita no FB.
Foto: Rabuño, Coto de Burés e Juan Carlos Collazo