Trátase dun festival dirixido ao público infantil, adulto e familiar, co que se pretende recuperar a tradición dos bonecos nas festas populares, segundo salienta a organización nunha nota de prensa.
Aproveitando que este ano Ourense ostenta a capitalidade cultural do Eixo Atlántico Galicia-Norte de Portugal, o Concello decidiu organizar este I Bonecos do Atlántico do martes día 24 ao sábado día 28. Para o martes, mércores, xoves, venres e sábado, hai programadas diferentes actuacións de compañías de monicreques tanto na Alameda Bispo Cesario como nos Xardíns Padre Feijóo. As funcións durante os catro días correrán a cargo dos grupos galegos Títeres Mircromina, Marionetas Trécola, Fantoches Baj, Larraitz Urruzola e Títeres Cascanueces; e dos grupos lusos Filandorra Teatro do Nordeste, Cia Fio d’Azeite, S.A. Marionetas Teatro & Bonecos e Títeres MAO.
Xa o sábado, 28 de xuño, celebrarase o Encontro de Xigantes e Cabezudos. A recepción será pola mañá na Alameda Bispo Cesario, onde tamén haberá instalados xogos populares de todo o mundo. Pola tarde terá lugar o desfile de cabezudos e xigantes polas rúas do centro da cidade de Ourense. No Encontro participarán xigantes e cabezudos procedentes dos concellos galegos de Ourense, Xinzo, O Barco, Allariz e Celanova; e gigantones e bombos dos concellos portugueses de Braga, Palmela e Vila Real. Todos eles recibirán unha estatuíña deseñada polo titiriteiro e escultor Luis Iglesias ‘Luchi’. Trátase dunha estatuíña do ‘Bocas’, o personaxe ideado por Eduardo Blanco Amor para ‘A Esmorga’.