Há um mês que a associaçom lançou a campanha de crowfounding "A Gentalha precisa de ti" na plataforma digital Verkami, que permite fazer doaçons a um determinado projeto até chegar a umha quantidade prefixada. No caso desta campanha, som 6000 euros os necessários para reformar o Centro Social O Pichel, gerido pola Gentalha.
Há mais de 8 anos que O Centro Social está aberto e neste tempo converteu-se num dos centros neurálgicos do associacionismo e dos movimentos sociais da Capital da Galiza. Agindo também como um espaço normalizador do ponto de vista linguístico, o Pichel fornece um local para todas aquelas iniciativas populares que o precisar. Cursos, palestras, concertos, reunions e outras atividades inundam semanalmente este espaço, que nom é usado só pola Gentalha do Pichel, mas por outros coletivos da cidade. Nestes 8 anos as condiçons do local tenhem-se deteriorado a pesar do esforço na manutençom do mesmo, e resulta especialmente urgente a instalaçom dum novo piso.
A dia de hoje a Gentalha leva recadados 4735 €, aportados por 147 pessoas, mas se nom se cumprir o objetivo de atingir os 6000 as doaçons serám devolvidas e a reforma nom se poderá realizar. Só restam 10 dias para o final do crowfounding, daí que a associaçom esteja a lançar esta campanha.
Som muitas as associaçons e coletivos galegos que estám a aroveitar esta ferramenta da internet para financiar projetos. O ano passado foi a Fundaçom Artábria quem fijo umha recadaçom para a elaboraçom dum documentário polo seu 15 aniversário, e este ano, para além da Gentalha, o Festival da Poesia do Condado também está imerso numha campanha de crowfounding.
A seguir, facilitamos a ligaçom do Verkami e os videos da campanha, que também se podem consultar na página da associaçom www.gentalha.org
Nom sejas forreta. Solta uns eurinhos!
