O meu amigo Tacho envia pola rede umha mensagem de garrafa, que pretende procurar informaçom sobre um cantante de Folque americano chamado Richard Farinha. Esta é a mensagem, que vem sendo umha petiçom de ajuda, amplificada, com curiosidade, desde aqui. A ver se conseguimos mais informaçom:
A primeira vez que soubem de Richard Farinha, foi nos últimos anos da década dos sessenta, quando todas as semanas comprava por 15 pesetas (0,11 euros) a revista MUNDO JOVEN, na que falavam de Folque americano (Seeger, Dylan…) ou da psicadélica californiana. Nessas páginas soubem da morte em um acidente de mota de um folky que residia en Carmelo (California) do que se chegou a dizer que de nom ter sucedido o seu passamento tam prematuro, teria ocupado o espaço de Dylan. O seu nome era Richard Farinha.
Daquela a transcriçom do apelido nas revisas era Farina (fonética ianque), mas com os anos apareceu bem escrito como Farinha e soava a apelido galego, nom si?
Meses atrás, merquei na Feira do disco que vem cada ano a Ourense, um vinilo de Richard e Mimi Farinha (por fim!), e tivem a ideia de procurar em YouTube vídeos da parelha. Em um deles, apresentado por Pete Seeger (o guru do Folque ianque) o apelido galego medra, aparecendo como Farinha - do Pico, o que fai duvidar da origem cubana do pai, tal e como aparece repetidamente nas biografias. Seria o pai cubano ou um galego emigrado a Cuba e depois aos USA?.
Mas Richard Farinha non era apenas um folky, por isso a continuaçom vai a resenha de El Boomerang, blog literário de EL PAÍS, na secçom de autores. Farinha foi escritor, autor Folque, militou no IRA e tivo contactos com a revoluçom castristra. Interessante:
Richard Farinha (New York, 1937 – Califórnia, 1966). Filho de pai cubano e mae irlandesa, passou a infância entre Brooklyn, Cuba e o Norte de Irlanda. Com dezoito anos foi membro do Exército Republicano da Irlanda (IRA), mas tivo que abandonar o país. Do mesmo modo, viajou a Cuba durante a insurreiçom de Fidel Castro e estivo presente mais tarde, quando os revolucionários entrárom na Havana. Por aqueles anos, Farinha estudava na Universidade de Cornell. Desde 1959 a 1963 morou em Londres e Paris, onde ganhou o pao como pudo, fazendo roteiros ocasionalmente, cantando na rua ou em pequenos contrabandos. Em 1963 casou com Mimí Baez, irmá da célebre Joan Báez, e voltou para a Califórnia onde terminou Hundido hasta el cielo.
Os seus textos breves aparecérom em revistas como Poetry, The Atlantic e Mademoiselle. As peças teatrais fôrom representadas em Cornell e em The Image Theater de Cambridge, Massachussets. Fue también reputado cantante y compositor de Folque-rock. Com a mulher, formou um duo que se apresentou no Festival de música Folque de Newport. Gravárom vários discos, o primeiro dos quais foi elegido polo New York Times como um dos dez melhores discos de 1965. O mesmo jornal opinou que o segundo, Reflections in a Cristal Wind, era “selvagem, imaginativo, poético, surpreendente”. Umha coleçom póstuma dos seus escritos foi publicada em 1969 sob o título de Long Time Coming and a Long Time Gone. Richard Farinha morreu em um acidente de motocicleta em Carmelo, Califórnia, apenas um mês depois de ter cumprido 29 anos e a dous dias da publicaçom de Hundido hasta el cielo.
Nos vídeos vemos ao matrimónio Farinha e também às irmás Baez, Joan e Mimi. Que os desfrutedes.