A Xunta vén de cubrir a praza de director-xerente da Axencia Galega de Industrias Culturais cun home con perfil empresarial e experiencia no sector da construción na empresa San José. No momento máis duro para o sector do espectáculo, a Consellaría de Cultura aposta por un home alleo completamente ao mundo cultural para cubrir a praza que continuaba vacante desde a marcha de Xoán Carlos Fasero -que proviña da creación e industria musical- para a SGAE.
Perfil laboral
Segundo o seu perfil público na rede social Linkedin, Jacobo Sutil estudou empresariais na USC entre 1991 e 1996, entrou na Escola de Negocios de Caixanova e realizou un master en dirección financeira no Cesma. En 1998 entrou a traballar na Constructora San José S.A. primeiro como responsábel da súa delegación en Valencia, logo como director do departamento en Mallorca e en 2002 como director de administración da delegación de Madrid e Castilla la Mancha. A relación con esta empresa da construción rematou en xuño de 2011 cando era Subdirector Comercial en Madrid.
Con pouca presenza nas redes sociais, Jacobo Sutil deixa claras as súas preferencias nas sete persoas e entidades das que é seguidor en twitter, Rafa Nadal, Piqué, F.C.Barcelona, Marca, ABC, The New York Times e Paul Gasol. Ningún contacto do mundo da cultura nin da Galiza.
