Fan entrega deste paquete na oficina de correos de Ferrol xa que, en datas pasadas negóuselles esta posibilidade no rexistro principal do edificio da Xunta de Galiza en Ferrol, ademais de prohibir tamén o acceso á prensa gráfica para que recollera a protesta, nun exercicio de falla total de democracia polo PP, que polo visto, tenlle máis medo á foto dos colectivos entregando ditos refugallos que "ao dano medioambiental e de saúde pública que está a provocar o incumprimento da Resolución ditada pola APLU (axencia de protección da legalidade urbanística) de xa hai dous anos, no referente ás preto de 70.000 toneladas de residuos altamente tóxicos depositados no monte dos Cocidos e que obriga á Xunta de Galiza a retiralos como responsábel civil subsidiaria se o Sr. Fermín Duarte (Construcciones Manmer SL), dono da parcela e responsábel da acumulación destes refugallos, non se fai cargo da súa retirada e a volta dos terreos ao seu estado orixinal" - denuncian.

Dende os colectivos que fan esta protesta teñen constancia de que sempre se permitiu o acceso á prensa e a entrega de paquetes de diversa índole dirixidos a cargos públicos na oficina do rexistro de Ferrol co cal, os leva a pensar que a prohibición con que se atoparon en datas pasadas o que trata realmente é de ocultar á cidadanía, un problema medio ambiental e de saúde pública.

Dende estas asociacións queren deixar claro que van seguir loitando, a pesar das cambadelas que poida pór o goberno do Sr. Nuñez Feixoo, como vén demostrando nas diferentes iniciativas que presentaron varios grupos da oposición no Parlamento de Galiza, instando a que se cumpra a legalidade no referente a este caso dos refugallos do Monte dos Cocidos. Cren que "xa é hora de que este goberno empece a usar o sentidiño no referente ao coidado e protección do medio ambiente e cumpra coas súas obrigas na preservación do patrimonio común".