Foto de José Manuel García (CC by-sa/2.0/) - Incêndio em Briom em 2010.
Para a CIG é especialmente grave o caso do mantemento e actual estado das autobombas, onde a Xunta conta con medios máis que obsoletos, vehículos nalgún caso con máis de 20 anos de uso e que en boa parte deles non contan co mecanismo de alta presión. Xa van varios casos onde a vida dos condutores de autobomba correu serio perigo.
Tamén van suficientes intoxicados por inhalación de fume como para que a Xunta tome medidas urxentes e dote @s traballador@s de mascarillas con filtros aptos para o monóxido de carbono, dióxido de carbono, amoníaco; sustancias que se emanan da combustión do incendio forestal.
Lumes como os que se produciron nesta fin de semana en Cualedro, non veñen máis que confirmar o que dende a CIG levan denunciando dende comezos de ano: "a nula política de prevención unida a un ano seco anunciaban un verán moi perigoso no que a lumes se refire".
A maiores o cambio de combustible polo abandono das terras e a proximidade do monte ás casas, están facendo deste verán do 2015 un verán con demasiados riscos ó patrimonio forestal, ós pobos e veciños, e ós traballadores do servizo de extinción de incendios pola precariedade dos medios que utilizan.
Asemade consideran que a Xunta "está mentindo no número de hectáreas queimadas como ven sendo habitual coa fin de agochar a verdadeira realidade que nos está asolando na provincia de Ourense".
Por todo isto, pola incompetencia e neglixencia na xestión do monte galego e por non facer nada diante do que se vía vir, a CIG-Autonómica esixe a dimisión da Conselleira do medio rural e do Secretario xeral de medio rural e montes.