Na convocatoria deuse cita un nutrido grupo de persoas, moitas delas representantes de outras entidades/colectivos no que foi unha actividade informativa e de achegamento que, anunciaron, será unha constante cada sábado a partires de hoxe, como xeito de presión ao concello ante a convocatoria da mesa de contratación para o derrube da casa, trala entrega das 1060 sinaturas que foi feita xa esta semana no Rexistro Xeral do Cocello.
No acto varios membros da Plataforma explicaron o momento no que están as reivindicacións do colectivo e convidaron a membros da Plataforma “Queremoslle ao Parque de Galeras” a estar presentes e explicar como foi/é a súa loita, para tomala como exemplo e convidar a moitas outras persoas/colectivos a participar máis activamente nas posibles solucións aos problemas locais.
Os apoios que o colectivo segue acadando oriéntanse agora cara colectivos/asociacións veciñais, culturais, xuvenís, etc así como continuar na recolleita de máis sinaturas ao tempo que se traballa na creación dun plan alternativo tanto para o edificio como para o acceso ao parque de Belvís dende a Praza do Matadoiro, tendo en conta o Plan Xeral que xa apunta o xeito no que debe facerse, empregando a finca colindante, xeito doado, directo e moito menos custoso.
O edificio da Casa da Xuventude retornará oficialmente das mans da Xunta de Galicia ás do Concello proximamente, no que a Plataforma insiste deberá ser unha entrega, como marca a lei, na que o edificio se devolva en perfectas condicións de uso e mantemento (para o cal o concello debería instar á Xunta a que realice as obras precisas a tal efecto).