Analíticas encarregadas pola delegación de ADEGA-Monterrei dos regos que drenan o Támega á altura de Laza, amosan importantes valores de As (arsénico) e Pb (chumbo), entre outros metais pesados.
Os contaminantes proveñen dos sedimentos arrastrados dende os desmontes e obras do AVE, e depositados nas canles da parte N da bacía do Támega. As análises dos fondos destes regos amosan cantidades de As e Pb que multiplican por 750 e 1986 veces os valores establecidos como NCA (normas de calidade ambiental) polo Decreto 60/2011 de calidade das augas.
Esta contaminación podería supoñer un risco sanitario e ambiental non só para a poboación de Laza, senón para toda a bacía do Támega e a comarca de Verín, famosa pola produción de augas minerais. O treito galego do río Támega forma parte tamén da Rede Natura 2000, precisamente polo bo estado ecolóxico das súas augas e as comunidades de bosque de ribeira nos vales septentrionais da bacía, precisamente os máis afectados polas verteduras contaminantes das obras do AVE.
Xunta e Confederación: o AVE non xustifica contaminar sen control
ADEGA vén de achegar un informe coas analíticas de augas aos concellos da comarca, así como á Confederación do Douro e á Consellaría de Medio Ambiente. É responsabilidade destas administracións garantir o bo estado ecolóxico destes espazos protexidos, das súas augas e da saúde dos seus habitantes.
Portanto, ADEGA esixe dos organismos responsábeis actuacións inmediatas para impedir novas verteduras por parte de ADIF, e a posta en marcha de medidas de restauración para minimizar o impacto destes contaminantes na saúde das persoas e do ecosistema naquelas áreas máis afectadas:
"O AVE e os supostos réditos políticos desta obra faraónica non poden ser a excusa para danar un patrimonio natural de altísimo valor, pasando por riba das leis ambientais e poñendo en risco a saúde dos habitantes da comarca".
Descargas
