Esta alertas recollen, entre outras, as recomendacións proteccionistas da Resolución 1815/2011 da Asemblea Parlamentaria do Consello de Europa –APCE- (na liña defendida pola Axencia Europea de Medio Ambiente, xa contemplada nalgunha medida polo Parlamento Europeo en 2009) que como proposta base propón: “Tomar tódalas medidas razoables para reducir a exposición aos campos electromagnéticos, especialmente ás radiofrecuencias emitidas por teléfonos móbiles, e en particular a exposición na infancia e mocidade”. Medidas como:
- “Informar sobre os riscos potenciais para a saúde dos teléfonos sen fíos DECT, os babyphones e outros aparatos eléctricos que emiten continuamente microondas pulsadas… e recomendar o uso de teléfonos con cable nos fogares, ou no seu defecto, modelos que non emitan permanentemente ondas pulsadas”.
- “Campañas de información dirixidas ao profesorado, nais e pais e o alumnado para advertirlles dos riscos específicos do uso precoz, indiscriminado e prolongado dos teléfonos móbiles e doutros dispositivos sen fíos”, primando para nenas e nenos en xeral centros de ensino libres de contaminación electromagnética (Wi-Fi, teléfono móbil), con “conexión a internet por cable”.
Nesta liña, no estado español xa son varias as federacións de nais e pais (como a Federación de ANPAS de Lugo), veciñais, sindicais, ecoloxistas (como Ecoloxistas en Acción e a Federación Ecoloxista Galega –da que forma parte a APDR-), partidos políticos, asociacións profesionais (como o Colexio Oficial de biólogos de Galicia), parlamentos autonómicos (Basco e Navarro), concellos … que denunciaron este problema de saúde pública que supón o aumento exponencial a exposición da poboación ás radiacións electromagnéticas, e solicitan a aplicación das recomendacións citadas do Consello de Europa.
Neste vindeiro 2015, os e as promotoras seguirán informando á comunidade educativa en defensa da saúde e dun uso racional e seguro da tecnoloxia.
